امداد کیلئے کھڑے نہتے فلسطینیوں پر اسرائیل کی ٹینکوں سے گولہ باری، 31 شہید
غزہ میں امداد کے لیے جمع فلسطینیوں پر اسرائیلی فوج کی ٹینکوں سے گولا باری اور فائرنگ سے کم سے کم 31 فلسطینی شہید اور سو سے زائد زخمی ہوگئے۔میڈیا رپورٹس کے مطابق رفح میں نتزاریم راہداری پر خوراک کی تقسیم کے امریکی مرکز پر ہزاروں فلسطینی جمع تھے۔اس موقع پر اسرائیلی ٹینکوں کی جانب سے گولا باری اور فائرنگ کی گئی۔
حملے کے بعد اسرائیلی فوج نے ایمبولینسوں کو زخمیوں تک رسائی روک دی۔نئی قائم کی جانے والی غزہ ہیومینیٹیرین فاؤنڈیشن نے پیر سے کام کا آغاز کیا تھا، تب سے اب تک اسرائیلی فوج امداد لینے کے لیے آئے افراد پر 4 بار حملے کرچکی ہے۔دوسری جانب امریکا نے اپنی پیش کردہ غزہ جنگ بندی کی تجویز پر حماس کے جواب کو ناقابلِ قبول قرار دے دیا۔
حماس کا کہنا ہے کہ مجوزہ معاہدے میں مستقل جنگ بندی کو یقینی نہیں بنایا گیا۔امریکی تجویز میں فلسطینی قیدیوں کی رہائی کے بدلے 10 اسرائیلی یرغمالیوں اور 18 اسرائیلی لاشوں کے تبادلے کی بات کی گئی ہے۔حماس کا کہنا ہے کہ اُس نے امریکا کو مثبت جواب دیا ہے لیکن مستقل جنگ بندی اور غزہ سے مکمل اسرائیلی انخلا کی ضمانت مانگی ہے۔
