وزیراعلیٰ پنجاب کا صوبے کو عالمی سطح پر ماحولیاتی لیڈر بنانے کا عزم
وزیراعلیٰ پنجاب مریم نواز نے صوبے کو عالمی سطح پر ماحولیات کے شعبے میں قائدانہ کردار ادا کرنے کے عزم کا اظہار کرتے ہوئے کہا ہے کہ پنجاب حکومت ماحولیاتی تحفظ کے حوالے سے نئے اقدامات کو ترجیح دے رہی ہے۔
وزیراعلیٰ کی ہدایت پر پنجاب انوائرمنٹ پروٹیکشن اتھارٹی (PEPA) گزشتہ ایک سال سے کاربن کریڈٹ پروگرام پر بھرپور طریقے سے کام کر رہی ہے، جس کا مقصد صوبے میں آلودگی کی سطح کو کم کرنا، توانائی کے موثر استعمال کو فروغ دینا اور ماحولیاتی تحفظ کو یقینی بنانا ہے۔ اس پروگرام کے تحت صنعتی شعبے میں کاربن اخراج کو کم کرنے کے لئے جدید ٹیکنالوجیز کا استعمال بڑھایا جائے گا اور آلودگی کے خاتمے کے لئے مختلف اقدامات کیے جائیں گے۔
یہ پروگرام نہ صرف ماحولیات کے حوالے سے اہم پیشرفت کا باعث بنے گا بلکہ غیر ملکی کرنسی کے ذخائر میں بھی اضافہ کرے گا، کیونکہ کاربن کریڈٹ کی تجارت عالمی سطح پر کی جا سکے گی۔ اس کے علاوہ، سبز صنعتوں کو فروغ دینے کے لئے حکومتی سطح پر نئی پالیسیز مرتب کی جا رہی ہیں تاکہ صنعتی اور تجارتی شعبے کو گرین ٹیکنالوجی کے استعمال کی ترغیب مل سکے۔
پروگرام کے تحت درختوں کی زیادہ سے زیادہ تعداد میں شجرکاری کی جائے گی، جس سے نہ صرف آلودگی کم ہوگی بلکہ قدرتی ماحول کی بحالی بھی ممکن ہوگی۔ اس کے ساتھ ساتھ غیر ملکی سرمایہ کاری کو بھی فروغ دینے کی کوشش کی جا رہی ہے تاکہ عالمی سطح پر ماحول دوست منصوبوں میں پنجاب کو ایک اہم کھلاڑی کے طور پر دیکھا جائے۔
وزیراعلیٰ نے اس پروگرام کی کامیابی کو صوبے کی معیشت کے لئے اہم قدم قرار دیتے ہوئے کہا کہ اس سے نہ صرف ماحول کو فائدہ پہنچے گا بلکہ روزگار کے نئے مواقع بھی پیدا ہوں گے، جو کہ پنجاب کے معاشی استحکام کے لئے ضروری ہیں۔
