ترک صدر رجب طیب اردوان بدھ سے پاکستان کا دو روزہ دورہ کریں گے
وزیراعظم محمد شہباز شریف کی دعوت پر ترک صدر رجب طیب اردوان بدھ سے پاکستان کا دو روزہ دورہ کریں گے۔دفتر خارجہ کے مطابق صدر رجب طیب اردوان کے ساتھ اعلیٰ سطح کا وفد بھی ہو گا جس میں وزراء اور اعلیٰ حکام کے علاوہ کارپوریٹ رہنما بھی شامل ہوں گے۔
دورے کے دوران وزیراعظم شہباز شریف اور صدر اردوان پاک ترک اعلیٰ سطحی اسٹریٹجک تعاون کونسل کے ساتویں اجلاس کی مشترکہ صدارت کریں گے۔
اجلاس کے اختتام پر ایک مشترکہ اعلامیہ اور متعدد اہم معاہدوں اور مفاہمت ناموں پر دستخط کیے جانے کی توقع ہے۔
دونوں رہنما مشترکہ پریس اسٹیک آؤٹ سے بھی خطاب کریں گے۔
صدر رجب طیب اردوان وزیراعظم شہباز شریف اور صدر آصف علی زرداری سے بھی دوطرفہ ملاقاتیں کریں گے۔
وزیر اعظم شہباز شریف کے ساتھ وہ پاکستان ترک بزنس اینڈ انویسٹمنٹ فورم سے خطاب کریں گے جس میں دونوں اطراف کے سرکردہ سرمایہ کاروں، کمپنیوں اور کاروباری افراد کو اکٹھا کیا جائے گا۔
اعلیٰ سطحی تزویراتی تعاون کونسل اعلیٰ سطحی فیصلہ سازی کا فورم ہے، جو دونوں ممالک کے درمیان دوطرفہ تعلقات کو مزید مضبوط بنانے کے لیے تزویراتی سمت فراہم کرتا ہے۔
اعلیٰ سطحی اسٹریٹجک کوآپریشن کونسل کے تحت متعدد مشترکہ قائمہ کمیٹیاں ہیں جن میں تجارت، سرمایہ کاری، بینکنگ، فنانس، ثقافت، سیاحت، توانائی، دفاع، زراعت، ٹرانسپورٹ، مواصلات، آئی ٹی، صحت، سائنس و ٹیکنالوجی اور تعلیم کے شعبوں کا احاطہ کیا گیا ہے۔
اب تک اعلیٰ سطحی سٹریٹجک کوآپریشن کونسل کے چھ اجلاس منعقد ہو چکے ہیں۔
آخری سیشن 2020 میں 13 اور 14 فروری کو اسلام آباد میں ہوا تھا۔
پاکستان اور ترکی تاریخی برادرانہ رشتوں میں بندھے ہوئے ہیں۔ ترک صدر کا دورہ اور اعلیٰ سطحی سٹریٹجک کوآپریشن کونسل کے ساتویں اجلاس کا انعقاد دونوں ممالک کے درمیان برادرانہ تعلقات کو مزید گہرا کرنے اور کثیر جہتی تعاون کو بڑھانے میں معاون ثابت ہوگا۔
