ٹی ٹوئنٹی ورلڈ کپ، فائنل ٹکرائو کل بھارت اور جنوبی افریقہ کے درمیان ہوگا
آئی سی سی ٹی 20 ورلڈ کپ 2024 کا فائنل کل بھارت اور جنوبی افریقا کے درمیان کھیلا جائے گا ، جنوبی افریقہ نے یکطرفہ مقابلے کے بعد سیمی فائنل میں پہلی پار پہنچنے والی افغانستان کی ٹیم کو نو وکٹوں شکست دیکر فائنل تک رسائی حاصل کی جبکہ بھارت نے دفاعی چیمپئن انگلینڈ کی ٹیم کو 68 رنز سے شکست دیکر فائنل میں جگہ بنائی ہے، دونوں ٹیمیں اب تک میگا ایونٹ میں ناقابل شکست ہیں، یہ پہلا موقع ہے کہ ٹی ٹوئنٹی ورلڈ کپ میں ایسی دو ٹیمیں مدمقابل ہیں جو ناقابل شکست ہیں، دوسری جانب فائنل بارش سے متاثر ہونے کا خدشہ ہے،۔
بارباڈوس میں ہفتے اور اتوار کو بارش کی پیش گوئی کی گئی ہے، بارباڈوس میں صبح سے شام 6 بجے تک بارش کی پیش گوئی ہے جبکہ ورلڈ کپ کے فائنل میچ کے لیے اتوار کو ریزرو ڈے بھی رکھا گیا ہے، اس دن بھی بارباڈوس میں بارش کا امکان ہے، اتوار کو صبح 11 سے شام 5 بجے کے درمیان بارش کا امکان ہے۔
پلیئنگ کنڈیشن کے مطابق میچ کے دونوں دن 190 منٹ کا اضافی وقت ہے، میچ کا آفیشل دورانیہ مقامی وقت پر صبح ساڑھے 10 سے دوپہر 1 بج کر 40 منٹ تک ہے جبکہ اضافی وقت کی صورت میں کھیل شام 4 بج کر 50 منٹ تک جاری رہ سکے گا، اگر فائنل مکمل نہ ہوسکا تو انڈیا اور جنوبی افریقا مشترکہ چیمپئن قرار پائیں گے۔
