جیلوں میں نظربند کشمیری رہنمائوں کو شدیدمشکلات کا سامنا ہے

عبدالصمد انقلابی نے سری نگر سے اپنے پیغامات میں مقبوضہ جموں کشمیر کے صاحب ثروت لوگوں پر زوردیاکہ وہ ضرورت مندوں بالخصوص شہدا کے اہلخانہ کا خیال رکھیں جنہوں نے مادر وطن کو بھارت کی غلامی سے نجات دلانے کے لیے اپنی جانیں قربان کی ہیں۔

اسلامی تنظیم آزادی جموں کشمیر کے چیئرمین اور سینئر حریت رہنما عبدالصمد انقلابی نے لوگوں پر زور دیا کہ وہ غیر قانونی طور پر نظر بند کشمیری حریت پسند و سیاسی رہنمائوں کی رہائی کے لیے دعا کریں جن کے ساتھ بھارتی جیلوں میں غیر انسانی سلوک کیا جا رہا ہے۔ عبدالصمد انقلابی نے کہا کہ جیلوں میں نظربند کشمیری رہنمائوں کو شدیدمشکلات کا سامنا ہے یہاں تک کہ انہی صحت کی بنیادی سہولت بھی میسر نہیں ہے۔

تنظیم کے چیئرمین اور کل جماعتی حریت کانفرنس کے سینئر رہنما عبدالصمد انقلابی نے کہا کہ عید خوشی اورمسرت کا دن ہے تاہم مظلوم کشمیریوں اور دیگر تمام مظلوموں کے لیے حقیقی عید اس دن ہوگی جب وہ ناجائز قبضوں سے مکمل آزادی حاصل کریں گے۔ انہوں نے کشمیریوں کو یقین دلایا کہ آزادی کی صبح ضرورطلوع ہوگی اور وہ ایک آزاد قوم بن کر ابھریں گے۔ مقبوضہ جموں کشمیر کی موجودہ مایوس کن صورتحال کا ذکر کرتے ہوئے سینئر حریت رہنما عبدالصمد انقلابی نے کہاکہ علاقے کے عام لوگوں پرمودی حکومت کے ظلم وستم اورجبر کی وجہ سے کشمیری عوام ابھی تک اس مبارک دن کی اصل روح سے محروم ہیں ۔ عبدالصمد انقلابی نے افسوس کا اظہار کیا کہ کشمیری بھارت کی ہٹ دھرمی اور جارحانہ پالیسیوں کی وجہ سے گزشتہ سات دہائیوں سے بے پناہ مصائب کا شکار ہیں ۔ عبدالصمدانقلابی نے عوام پر زور دیا کہ وہ اپنے خلاف فسطائی مودی کے مذموم عزائم کو ناکام بنانے کے لیے اپنی صفوں میں اتحادواتفاق پیدا کریں۔

سینئر حریت رہنما عبدالصمد انقلابی نے کہا کہ بھارت کشمیریوں کو دبانے کے لیے کالے قوانین اور ماورائے عدالت ہتھکنڈے استعمال کر رہاہے تاہم بہادر کشمیری عوام نے آزادی اور وقار کی جدوجہد پر سمجھوتہ کئے بغیر بھارت کے ظلم و بربریت کے خلاف مزاحمت جاری رکھی۔ انہوں نے کہا کہ بھارت کو یہ حقیقت یاد رکھنی چاہئے کہ حقیقی آزادی کی تحریکوں کو فوجی طاقت سے دبایا نہیں جا سکتا۔

سینئر حریت رہنما عبدالصمد انقلابی نے کہاکہ کشمیریو ں کے بلند حوصلوں کے آگے بھارت کے ہر حربے ناکام ہوچکے ہیں اب بھارت کشمیری مسلمانوں کی اکثریت کو اقلیت میں تبدیل کرنے کے اپنے مذموم منصوبے پر عمل پیر ا ہے جس کے لئے بھارت کی مودی سرکار مرحلہ وار منصوبے کو آگے بڑھا رہی ہے عبدالصمدانقلابی نے خبر دار کیا کہ مودی سرکار کو اگر اس مرحلے پر نہ روکا گیا تو اس سے پورے خطے کے امن خطرے میں پڑجائیگا

سینئر حریت رہنما عبدالصمد انقلابی نے کشمیری عوام سے اپیل کی کہ و ہ ضرورت مندخاص کرشہدا کے خاندانوں کا خیال رکھیں جنہوں نے مادر وطن کو بھارت کی غلامی سے نجات دلانے کے لیے اپنی جانیں قربان کی ہیں،انہوں عید کے اجتماعات میں کشمیر کی آزادی اور شہداء کے لئے خصوصی دعائیں کرنے کی بھی اپیل کی ہے ۔

اشتہار