پاکستان اور ازبکستان نے زرعی تحقیق، بیجوں کی تیاری، باغبانی اور لائیوسٹاک کے شعبوں میں دوطرفہ تعاون کو وسعت دینے کے امکانات تلاش کرنے پر اتفاق کیا ہے، جبکہ جدید ٹیکنالوجی اور موسمیاتی تبدیلیوں کے اثرات برداشت کرنے والی زرعی سرگرمیوں کے فروغ پر بھی زور دیا گیا ہے۔
اس حوالے سے اتفاق ترکیہ کے شہر انطالیہ میں کوپ 31 سربراہی اجلاس کے موقع پر وفاقی وزیر برائے قومی غذائی تحفظ و تحقیق رانا تنویر حسین اور ازبکستان کے نائب وزیر زراعت علیشیر شکوروف کے درمیان ملاقات میں کیا گیا۔
ملاقات کے دوران دونوں ممالک نے بالخصوص کپاس اور باغبانی سے متعلق فصلوں کے لیے ہائبرڈ اور جینیاتی طور پر تبدیل شدہ بیجوں کی تیاری اور مشترکہ تحقیق کے مواقع پر تبادلہ خیال کیا۔ اس کے علاوہ لائیوسٹاک کی ترقی کے لیے تکنیکی تعاون پر بھی گفتگو ہوئی۔
دونوں جانب سے زرعی پیداوار میں اضافے اور غذائی تحفظ کو مضبوط بنانے کے لیے سائنسی مہارتوں سے استفادے، تحقیقی تجربات کے تبادلے اور جدید زرعی حل تلاش کرنے کی اہمیت پر زور دیا گیا۔
اس موقع پر وفاقی وزیر رانا تنویر حسین نے ازبکستان کی جانب سے تکنیکی وفد پاکستان بھیجنے کی تجویز کا خیرمقدم کیا اور دونوں ممالک کے زرعی ماہرین اور متعلقہ تحقیقی اداروں کے درمیان براہ راست روابط کے فروغ میں تعاون کی یقین دہانی کرائی۔
مجوزہ وفود کے تبادلے سے مشترکہ تحقیق، ٹیکنالوجی کی منتقلی اور ادارہ جاتی تعاون کے عملی شعبوں کی نشاندہی میں مدد ملے گی۔
ملاقات میں کوپ 31 کے موقع پر ازبکستان کے موسمیاتی تبدیلی سے ہم آہنگ زرعی و غذائی سرمایہ کاری کے ایجنڈے کے تناظر میں بھی تعاون کی اہمیت اجاگر کی گئی۔
دونوں ممالک نے موسمیاتی تبدیلیوں سے مطابقت رکھنے والے بیجوں، پائیدار زرعی طریقوں، لائیوسٹاک تحقیق اور جدید زرعی ٹیکنالوجی کے شعبوں میں مشترکہ اقدامات کے امکانات پر بھی تبادلہ خیال کیا۔
یہ پیش رفت پاکستان کی جانب سے بین الاقوامی زرعی شراکت داریوں کو وسعت دینے، تحقیق پر مبنی ترقی کو فروغ دینے اور دوست ممالک کے ساتھ زرعی شعبے میں عملی تعاون بڑھانے کی کوششوں کا حصہ ہے۔
-
-
-
-
-
-
