چیئرمین سینیٹ یوسف رضا گیلانی نے مضبوط اور خوشحال پاکستان کی تعمیر کے عزم کی تجدید پر زور دیا ہے۔
اسلام آباد کے جناح کنونشن سینٹر میں منعقدہ آزادی کلچرل شو سے خطاب کرتے ہوئے چیئرمین سینیٹ نے کہا کہ قومی مفادات کو ذاتی اور سیاسی مفادات پر ترجیح دینے کی ضرورت ہے۔
انہوں نے کہا کہ تاریخ گواہ ہے کہ پاکستانی قوم نے ہمیشہ عزم، حوصلے اور اتحاد کے ساتھ چیلنجز اور آزمائشوں کا مقابلہ کیا ہے۔
یوسف رضا گیلانی نے کہا کہ یوم آزادی برصغیر کے مسلمانوں کی اس تاریخی جدوجہد کی یاد دلاتا ہے جو قائداعظم محمد علی جناح کی قیادت میں قیام پاکستان کے لیے کی گئی۔ انہوں نے اس جدوجہد میں دی جانے والی قربانیوں کو خراج عقیدت پیش کیا۔
چیئرمین سینیٹ نے پاکستان کے دفاع اور سلامتی کے لیے مسلح افواج اور قانون نافذ کرنے والے اداروں کی قربانیوں کو بھی خراج تحسین پیش کیا۔ انہوں نے کہا کہ قوم ملکی خودمختاری، سلامتی اور علاقائی سالمیت کے دفاع میں اپنی مسلح افواج کے شانہ بشانہ کھڑی ہے۔
انہوں نے کہا کہ پاکستان باہمی احترام اور مشترکہ مفادات کی بنیاد پر ہمسایہ اور دیگر ممالک کے ساتھ پرامن تعلقات کا خواہاں ہے۔ ان کے مطابق پاکستان کی ذمہ دار، امن پسند اور متحرک ملک کی حیثیت حالیہ عرصے میں مزید مضبوط ہوئی ہے۔
یوسف رضا گیلانی نے کہا کہ امریکا اور ایران کے درمیان پاکستان کی مؤثر اور بروقت ثالثی نے عالمی امن اور استحکام کے فروغ میں کردار ادا کیا۔
انہوں نے مکہ مشترکہ دفاعی معاہدے کو پاکستان کی سفارتی اور اسٹریٹجک کامیابی قرار دیتے ہوئے کہا کہ اس سے خطے میں تعاون، اعتماد اور اجتماعی سلامتی کے لیے ایک نئے باب کا آغاز ہوا ہے۔
چیئرمین سینیٹ نے مقبوضہ جموں و کشمیر کے عوام کے لیے پاکستان کی اخلاقی، سیاسی اور سفارتی حمایت کا اعادہ کرتے ہوئے کہا کہ پاکستان آزاد اور خودمختار فلسطینی ریاست کے قیام کے لیے بھی اپنی آواز بلند کرتا رہے گا۔
-
-
-
-
-
-
