وزیراعظم شہباز شریف نے کہا ہے کہ ان کا حالیہ دورہ ترکیہ دونوں برادر ممالک کے درمیان دیرینہ تعلقات کو مزید مضبوط بنانے میں اہم کردار ادا کرے گا۔
وزیراعظم کی زیر صدارت اسلام آباد میں وفاقی کابینہ کا اجلاس ہوا، جس میں انہوں نے کابینہ کو اپنے حالیہ ترکیہ اور ایران کے دوروں کے نتائج سے آگاہ کیا۔
وزیراعظم نے بتایا کہ ترکیہ کے سرمایہ کاروں اور کاروباری رہنماؤں نے پاکستان کے مختلف شعبوں، بالخصوص معدنیات، کان کنی اور توانائی کے شعبوں میں سرمایہ کاری میں گہری دلچسپی کا اظہار کیا ہے۔
شہباز شریف نے کابینہ کو مزید بتایا کہ انہوں نے پاکستانی وفد کے ہمراہ ایران کے سپریم لیڈر مرحوم آیت اللہ سید علی خامنہ ای کی نمازِ جنازہ اور تدفین کی تقریبات میں شرکت کی۔
اجلاس کے دوران وزیراعظم نے پاکستان فضائیہ کے گروپ کیپٹن عاصم طارق شہید کو زبردست خراجِ عقیدت پیش کیا، جنہوں نے اسلام آباد میں ایک خاتون کی جان بچاتے ہوئے جامِ شہادت نوش کیا۔
وزیراعظم نے کہا کہ اس واقعے میں ملوث ملزم کو گرفتار کر لیا گیا ہے اور اسے قانون کے مطابق انصاف کے کٹہرے میں لایا جائے گا۔
دہشت گردی کے خلاف جنگ میں سیکیورٹی فورسز کی قربانیوں اور خدمات کو سراہتے ہوئے، وزیراعظم نے بلوچستان میں حالیہ کارروائی کے دوران 15 دہشت گردوں کی ہلاکت کا حوالہ دیا اور اس یقین کا اظہار کیا کہ وہ دن دور نہیں جب ملک سے دہشت گردی کا مکمل خاتمہ ہو جائے گا۔
وفاقی کابینہ نے دہشت گردی کے خلاف جنگ میں شہید ہونے والے سیکیورٹی اہلکاروں کے ایصالِ ثواب کے لیے فاتحہ خوانی بھی کی۔
-
-
-
-
-
-
