پاکستان کے فیلڈ مارشل سید عاصم منیر، نشانِ امتیاز (ملٹری)، ہلالِ جرات، چیف آف آرمی اسٹاف اور چیف آف ڈیفنس اسٹاف نے ایران کا مختصر مگر انتہائی اہم اور نتیجہ خیز سرکاری دورہ مکمل کر لیا۔
دورے کے دوران فیلڈ مارشل نے ایرانی قیادت سے اعلیٰ سطحی ملاقاتیں کیں۔ یہ ملاقاتیں خطے میں آٹھ اپریل 2026 کی جنگ بندی کے بعد پیدا ہونے والی کشیدگی کے تناظر میں کشیدگی کم کرنے اور تعمیری سفارتی عمل کو آگے بڑھانے کی جاری ثالثی کوششوں کا حصہ تھیں۔
فیلڈ مارشل سید عاصم منیر نے ایران کے صدر ڈاکٹر مسعود پزشکیان، ایرانی پارلیمنٹ کے اسپیکر محمد باقر قالیباف، وزیر خارجہ عباس عراقچی اور وزیر داخلہ اسکندر مومنی سے ملاقاتیں کیں۔
ملاقاتوں میں خطے میں امن و استحکام کے فروغ، مشاورتی عمل کو تیز کرنے اور حتمی معاہدے تک پہنچنے کے مختلف پہلوؤں پر تفصیلی تبادلہ خیال کیا گیا۔
بات چیت مثبت اور تعمیری ماحول میں ہوئی، جس نے ثالثی عمل کو مؤثر انداز میں آگے بڑھانے میں اہم کردار ادا کیا۔ گزشتہ چوبیس گھنٹوں کے دوران ہونے والے بھرپور مذاکرات کے نتیجے میں حتمی مفاہمت کی جانب حوصلہ افزا پیش رفت سامنے آئی ہے۔
ایرانی قیادت نے علاقائی مسائل کے پرامن حل اور مذاکرات کے فروغ میں پاکستان کے مخلصانہ اور مثبت کردار کو سراہا۔
فیلڈ مارشل سید عاصم منیر کی ایران آمد پر ایرانی وزیر داخلہ اسکندر مومنی سمیت اعلیٰ سول اور عسکری حکام نے ان کا استقبال کیا۔
-
-
-
-
-
-
