ٹریفک بہار مشاعرہ: ادب، شعور اور ذمہ داری کا حسین امتزاج

ضلع منڈی بہاؤالدین کی سرزمین ہمیشہ سے علم و ادب کی آماجگاہ رہی ہے۔ یہاں کے باسی نہ صرف زبان و بیان کے دلدادہ ہیں بلکہ تہذیب، شعور اور سماجی ذمہ داری کے جذبے سے بھی سرشار دکھائی دیتے ہیں۔ یہی وجہ ہے کہ جب ادب اور عوامی آگاہی کو یکجا کرنے کی کوئی کوشش کی جاتی ہے تو اہلِ علاقہ بھرپور انداز میں اس کا حصہ بنتے ہیں۔ حالیہ “ٹریفک بہار مشاعرہ” اسی خوبصورت روایت کا تسلسل تھا، جس نے نہ صرف شعری محفل کو چار چاند لگائے بلکہ معاشرتی شعور کو بھی اجاگر کیا۔

ڈسٹرکٹ ٹریفک پولیس اور واسا منڈی بہاؤالدین کے اشتراک سے ڈسٹرکٹ جناح پبلک اسکول میں منعقد ہونے والا یہ مشاعرہ محض ایک ادبی نشست نہیں تھا بلکہ اس میں ایک واضح پیغام بھی پوشیدہ تھا—زندگی کی حفاظت، قانون کی پاسداری اور شہری ذمہ داری کا احساس۔ اس تقریب میں ملک بھر سے آئے نامور شعرائے کرام نے شرکت کی اور اپنے کلام سے سامعین کو محظوظ کیا۔

مشاعرے کی صدارت بین الاقوامی شہرت یافتہ شاعر حسن عباس رضا نے کی۔ مہمانانِ خصوصی میں عرفان خانی (اسلام آباد) اور شاہد فیروز (گوجرانوالہ) شامل تھے۔ مہمانانِ اعزاز میں معروف قلمکارہ نمرہ ملک (تلہ گنگ)، راشدہ کنول (آزاد کشمیر)، مکرم حسین زمزم (گوجرانوالہ)، نوید اقبال (گکھڑ)، انعام کبیر (کامونکی) اور عصمت اللہ سیکھو (گوجرانوالہ) نے شرکت کی۔

میزبان شعراء میں ضیغم مغیرہ، نعیم رضا بھٹی اور توقیر احمد شامل تھے، جنہوں نے اپنے خوبصورت کلام سے محفل کو گرما دیا۔ نظامت کے فرائض سید حسنین محسن نے نہایت عمدگی سے سرانجام دیے اور اپنے منفرد انداز سے سامعین کو محظوظ کرتے رہے۔

اس کامیاب مشاعرے کے انعقاد میں ٹریفک ایجوکیشن آفیسر عرفان نواز رانجھا اور ادریس قریشی کا کلیدی کردار رہا، جبکہ ٹریفک اسسٹنٹ ناصر عباس نے بھی بھرپور معاونت کی۔ ڈسٹرکٹ ٹریفک پولیس آفیسر راشد بشیر نے اپنے عملہ کے ہمراہ میزبانی کے فرائض انجام دیے۔

تقریب میں تعلیمی اداروں کی نمایاں شرکت بھی دیکھنے میں آئی۔ یونیورسٹی آف گجرات کیمپس منڈی بہاؤالدین کے طلباء و طالبات نے ڈائریکٹر ڈاکٹر ذکی الزمان عاصم، رجسٹرار عرفان جاوید، سید کاظم حسین شاہ اور ایڈمن مدثر شریف کی قیادت میں شرکت کی۔ ڈسٹرکٹ جناح پبلک اسکول کے طلباء پرنسپل طارق جاوید اور ایڈمن مرزا ساجد محمود کی زیر نگرانی شریک ہوئے۔ پاکستان ٹیکنیکل کالج کے طلباء پرنسپل و ڈائریکٹر رانا محمد اسماعیل اور دیگر اساتذہ کی رہنمائی میں شریک ہوئے۔

دیگر معزز شرکاء میں اختر محمود وڑائچ، محمد اجمل اسکندری، مدثر عزیز چیمہ، بدر چدھڑ، محمد ارشد گوندل، پروفیسر ظہیر ہنجرا، زبیر سرور وڑائچ، سید مظفر حسین شاہ، ذوالقرنین ساہی اور حاجی سر بلند شامل تھے۔
سرکاری فرائض میں نمایاں کارکردگی پر ٹریفک وارڈن سہیل عمران، آئی ایس آئی عامر ریاض بٹ، آئی ایس آئی پرویز انور گوندل اور ہیڈ کانسٹیبل رضوان محمود رانجھا کو شیلڈز سے نوازا گیا۔

مشاعرے کے مہمانانِ خصوصی میں انجینئر احمد علی (مینیجنگ ڈائریکٹر واسا)، وقاص احمد گوندل (اسسٹنٹ مینیجنگ ڈائریکٹر واسا) اور رانا محمد کاشف (ڈپٹی ڈائریکٹر واسا) شامل تھے۔ تقریب کے اختتام پر انجینئر احمد علی نے شعرائے کرام میں شیلڈز تقسیم کیں اور اپنے خطاب میں ٹریفک قوانین کی پابندی، سڑکوں کی حفاظت اور شہری ذمہ داریوں کی اہمیت پر زور دیا۔

یہ مشاعرہ اس بات کا عملی ثبوت ہے کہ اگر ادارے چاہیں تو ادب کو سماجی شعور کے فروغ کے لیے مؤثر ذریعہ بنایا جا سکتا ہے۔ “ٹریفک بہار مشاعرہ” نہ صرف ایک کامیاب ادبی تقریب تھی بلکہ ایک ایسی شاندار روایت کی بنیاد بھی ہے جو مستقبل میں مزید مضبوط ہو سکتی ہے۔ ایسے پروگرام نہ صرف ذہنی آسودگی فراہم کرتے ہیں بلکہ معاشرے میں مثبت تبدیلی کی راہیں بھی ہموار کرتے ہیں۔