وزیرِاعظم شہباز شریف نے گوادر اور گلگت بلتستان کے لیے بجلی کے متعدد اہم منصوبوں کی منظوری دے دی

وزیرِاعظم شہباز شریف نے گوادر اور گلگت بلتستان کے لیے بجلی کے متعدد اہم منصوبوں کی منظوری دے دی
وزیرِاعظم شہباز شریف نے گوادر اور گلگت بلتستان کے لیے بجلی کے متعدد اہم منصوبوں کی منظوری دے دی ہے۔اسلام آباد میں پاور سیکٹر میں جاری اصلاحات سے متعلق اجلاس کی صدارت کرتے ہوئے وزیرِاعظم نے گوادر میں بجلی کی فراہمی کے مسائل کے فوری حل کے لیے جامع منصوبے پر عملدرآمد کی منظوری دی۔ انہوں نے کہا کہ گوادر میں بلا تعطل بجلی کی فراہمی مقامی اقتصادی سرگرمیوں اور سرمایہ کاری کے فروغ میں اہم کردار ادا کرے گی۔وزیرِاعظم نے اس امید کا اظہار کیا کہ مسلسل بجلی اور دیگر سہولیات کی فراہمی سے گوادر کی بندرگاہ دنیا کی بہترین اور مستقبل کی معاشی سرگرمیوں کا اہم مرکز بن جائے گی۔اجلاس میں گلگت بلتستان میں 100 میگاواٹ کے سولر منصوبے کے لیے بھی فوری اقدامات کی ہدایت کی گئی، تاکہ خطے کو ماحول دوست، مستحکم اور مسلسل بجلی کی فراہمی یقینی بنائی جا سکے۔ وزیرِاعظم نے کہا کہ گلگت بلتستان کے عوام کی فلاح و بہبود اور معاشی ترقی وفاقی حکومت کی اولین ترجیحات میں شامل ہے۔
انہوں نے بتایا کہ وفاقی حکومت گلگت بلتستان میں صنعتی سرگرمیوں، سرمایہ کاری اور معاشی ترقی کے فروغ کے لیے تمام ضروری اقدامات کر رہی ہے۔وزیرِاعظم نے وفاقی وزیر احسن اقبال کی سربراہی میں قائم کمیٹی اور وزارتِ توانائی کی سفارشات کو سراہتے ہوئے وزارت کو ہدایت کی کہ جامع حکمتِ عملی پر مؤثر عملدرآمد یقینی بنایا جائے، جس میں فوری، قلیل مدتی اور طویل مدتی منصوبے شامل ہیں۔اجلاس کو بتایا گیا کہ گوادر میں گھریلو اور کاروباری صارفین کو بجلی کی فراہمی کے لیے مؤثر اقدامات کیے جا رہے ہیں۔ مزید یہ کہ گلگت بلتستان میں بجلی کے منصوبوں کے لیے مقررہ مدت میں زمین، رابطہ کاری، انفراسٹرکچر اور دیگر ضروری سہولیات فراہم کی جائیں گی۔

اشتہار