پاکستان کی نیشنل ڈیزاسٹر مینجمنٹ اتھارٹی نے مسلح افواج کے قریبی تعاون سے سری لنکا میں سیلاب سے متاثرہ افراد کے لیے انسانی ہمدردی کی بنیاد پر ریلیف آپریشن شروع کر دیا ہے۔
این ڈی ایم اے نے فوری امداد کی فراہمی کے لیے انتظامات مکمل کر لیے ہیں اور آج ابتدائی امدادی سامان کے ساتھ اربن سرچ اینڈ ریسکیو ٹیم کو سری لنکا روانہ کیا جا رہا ہے۔ ابتدائی کھیپ میں ایک سو ٹن ضروری امدادی سامان شامل ہے، جبکہ پینتالیس رکنی پاک فوج کی یو ایس اے آر ٹیم بھی ہمراہ ہوگی۔
امدادی پیکیج میں جان بچانے اور ریسکیو میں استعمال ہونے والے اہم آلات شامل ہیں جن میں ریسکیو کشتیاں، ڈی واٹرنگ پمپ اور لائف جیکٹس شامل ہیں۔ اس کے علاوہ ایک موبائل فیلڈ اسپتال بھی متاثرہ علاقوں میں فوری طبی امداد فراہم کرنے کے لیے تعینات کیا جا رہا ہے۔
دوسری جانب پاک بحریہ نے بھی سری لنکن حکام کو سیلاب متاثرین کے لیے امدادی سامان فراہم کر دیا ہے۔ آئی ایس پی آر کے مطابق پاک بحریہ کا جہاز سیف، جو انٹرنیشنل فلیٹ ریویو 25 میں شرکت کے سلسلے میں کولمبو میں موجود ہے، نے مقامی آبادی کے لیے انسانی امداد اور ڈیزاسٹر ریلیف کارروائیاں فوری طور پر شروع کر دی ہیں۔
پی این ایس سیف نے سری لنکن حکام کو جو امدادی سامان فراہم کیا ہے، اس میں بنیادی غذائی اجناس، تیار خوراک، خشک راشن، فرسٹ ایڈ کٹس، ہنگامی ادویات اور ضروری آلات شامل ہیں تاکہ جاری قومی ریلیف کوششوں میں معاونت فراہم کی جا سکے۔
-
-
-
-
-
-
