وزیر اعلیٰ پنجاب کا ڈیجیٹل مالیاتی نظام میں انقلابی اقدام، ٹی کیس کارڈ کا اجراء کردیا
وزیراعلیٰ پنجاب مریم نواز نے صوبے میں پبلک ٹرانسپورٹ کے شعبے کو جدید تقاضوں سے ہم آہنگ کرتے ہوئے ’’ٹی کیش کارڈ‘‘ (T-Cash Card) کا باقاعدہ اجراء کر دیا ہے۔ اس کارڈ کا مقصد شہریوں کو ایک ایسا جدید، آسان اور بغیر نقدی (cashless) نظام فراہم کرنا ہے جس کے ذریعے وہ مختلف پبلک ٹرانسپورٹ سروسز میں باآسانی کرایہ ادا کر سکیں۔ٹی کیش کارڈ ایک سمارٹ ری چارج ایبل کارڈ ہے جو شہریوں کو پنجاب کے تمام بڑے ٹرانزٹ سسٹمز جیسے میٹرو بس، اورنج لائن ٹرین، سپیڈو بس، الیکٹرو بس اور دیگر مربوط سفری سہولیات میں استعمال کی اجازت دے گا۔ اس کے ذریعے ہر سروس کے لیے علیحدہ ٹکٹ لینے کی ضرورت ختم ہو جائے گی، اور ایک ہی کارڈ سے تمام کرایے ادا کیے جا سکیں گے۔
یہ کارڈ نہ صرف سفری سہولت فراہم کرے گا بلکہ اسے ایک مکمل ڈیبٹ کارڈ کے طور پر بھی استعمال کیا جا سکے گا۔ صارفین اس کارڈ سے خریداری، بلوں کی ادائیگی، رقم نکالنے اور دیگر روزمرہ مالی لین دین بھی انجام دے سکیں گے۔ اس طرح یہ کارڈ بیک وقت سفر اور بینکاری دونوں کی سہولت فراہم کرے گا، جو کہ صوبے میں ڈیجیٹل معیشت کی طرف ایک اہم قدم ہے۔ٹی کیش کارڈ وہ تمام شہری حاصل کر سکتے ہیں جو نادرا کے ڈیٹا بیس میں رجسٹرڈ اور تصدیق شدہ ہوں اور اسٹیٹ بینک آف پاکستان کے وضع کردہ قواعد و ضوابط پر پورا اترتے ہوں۔ اس سے نہ صرف مالی شمولیت (financial inclusion) کو فروغ ملے گا بلکہ باضابطہ معیشت کی وسعت میں بھی اضافہ ہو گا۔
کارڈ کے حصول کے لیے شہری سرکاری ویب پورٹل، موبائل ایپلیکیشن یا ہیلپ لائن 1762 کے ذریعے درخواست دے سکتے ہیں۔ ہیلپ لائن پر کسٹمر سروس نمائندے شہریوں کی مکمل رہنمائی فراہم کریں گے تاکہ درخواست کا عمل سہل بنایا جا سکے۔ٹی کیش کارڈ کے اجراء کی فیس صرف 130 روپے مقرر کی گئی ہے۔ درخواست دہندگان اپنے قریبی مقررہ اسٹیشن کا انتخاب کر کے وہاں سے کارڈ وصول کر سکتے ہیں۔ ایک بار کارڈ دستیاب ہونے کے بعد شہریوں کے لیے ضروری ہو گا کہ وہ اسے 10 دن کے اندر اندر وصول کر لیں، بصورت دیگر دوبارہ پراسیسنگ کی ضرورت پیش آ سکتی ہے۔
کارڈ کے اجراء کا اسٹیٹس معلوم کرنے کے لیے شہری سرکاری ویب سائٹ، موبائل ایپ یا ہیلپ لائن 1762 سے رابطہ کر سکتے ہیں۔ ان ذرائع کے ذریعے درخواست دہندگان کو اپنے کارڈ کی تیاری اور فراہمی کے بارے میں بروقت معلومات دستیاب ہوں گی۔ٹی کیش کارڈ کا اجراء وزیراعلیٰ مریم نواز کی انقلابی وژن کا عکاس ہے، جو صوبے میں سہل، محفوظ اور جدید سفری و مالیاتی نظام کے قیام کی طرف ایک اہم پیش رفت ہے۔ یہ کارڈ شہریوں کی زندگی میں آسانی پیدا کرنے کے ساتھ ساتھ صوبے کو ڈیجیٹل معیشت کی راہ پر گامزن کرے گا۔
