آئی جی ایف سی کے پی (جنوبی) فتنہ الخوارج کے خلاف جنگ میں قبائلی عوام کی قربانیوں کے معترف
جنوبی وزیرستان کے علاقے سپنکئی رغزئی میں محسود اور برکی قبائلی عمائدین کا گرینڈ جرگہ منعقد ہوا۔انسپکٹر جنرل فرنٹیئر کور خیبر پختونخوا (جنوبی) نے جرگے میں بطور مہمان خصوصی شرکت کی۔گرینڈ جرگہ کے دوران قبائلی عمائدین نے علاقے میں دیرپا امن کے حصول کے لیے پاک فوج اور فرنٹیئر کور خیبر پختونخوا (جنوبی) کی قربانیوں کو زبردست خراج تحسین پیش کیا۔
انہوں نے فتنہ الخوارج کے مکمل خاتمے تک سیکورٹی فورسز کے ساتھ تعاون اور کندھے سے کندھا ملا کر کھڑے ہونے کے عزم کا اعادہ کیا۔جرگے سے خطاب کرتے ہوئے مہمان خصوصی نے فتنہ الخوارج کے خلاف جنگ میں قبائلی عوام کی بے پناہ قربانیوں کو سراہا۔ انہوں نے نوجوان نسل کو ملک دشمن عناصر کے منفی پروپیگنڈے سے دور رکھنے کی اہمیت پر زور دیا۔
انہوں نے مختلف شعبوں میں شاندار کارکردگی کا مظاہرہ کرنے والے مقامی لوگوں کی خدمات کو بھی سراہا اور ان کی حوصلہ افزائی کی اور ان کے جذبے، محنت اور مثبت کردار کو علاقے کے لیے قابل تقلید قرار دیا۔
اس موقع پر آئی جی ایف سی نے محسود قبائل کو یقین دلایا کہ ان کے دیرینہ مطالبے پر گرباز تا منگروٹائی روڈ پر کام جلد شروع کر دیا جائے گا۔قبائلی عمائدین نے بچیوں کی تعلیم کے فروغ اور مختلف ترقیاتی منصوبے شروع کرنے میں پاک فوج اور فرنٹیئر کور خیبر پختونخوا (جنوبی) کی کوششوں کو سراہا۔
