وزیر اعلیٰ پنجاب نے انڈر پرفارمنگ کالجز سے متعلق رپورٹ بھی طلب کر لی
پنجاب میں تعلیم کے معیار کو بہتر بنانے کیلئے اہم اقدامات اٹھا لئے گئے۔وزیراعلیٰ پنجاب مریم نواز شریف کی زیر صدارت خصوصی اجلاس ہوا جس میں ہائر ایجوکیشن ڈیپارٹمنٹ سے متعلق تفصیلی بریفنگ دی گئی، اجلاس میں برطانیہ، کوریا اور قازقستان سمیت متعدد غیر ملکی یونیورسٹیوں کا پنجاب میں کیمپس بنانے میں اظہار دلچسپی سامنے آیا۔پنجاب کے سرکاری کالجز میں بھی کالج مینجمنٹ کونسل قائم کرنے پر اتفاق ہوا، پنجاب کی یونیورسٹیوں میں معیار تعلیم بلند کرنے کے لئے ”کے پی آئی“ سسٹم نافذ کرنے کا فیصلہ بھی کیا گیا، وائس چانسلر کی کارکردگی کو”کے پی آئی“ کے معیار پر جانچا جائے گا۔دوران اجلاس وزیراعلیٰ مریم نواز شریف نے ایجوکیشن ویجی لینس سکواڈ قائم کرنے کی منظوری دی، ایجوکیشن ویجی لینس سکواڈ تعلیمی اداروں میں اچانک حاضری، صفائی، معیار تعلیم اور دیگر امور چیک کرے گا، منسٹر ایجوکیشن کی زیر نگرانی ایجوکیشن ویجی لینس سکواڈ کی رپورٹ پر فوری کارروائی عمل میں لائی جائے گی۔
معیار تعلیم کے لحاظ سے پنجاب کی یونیورسٹیوں کی گرین، بلیو، ییلو اور گرے رینکنگ مقرر کرنے کی تجویز کا جائزہ بھی لیا گیا، وزیراعلیٰ مریم نواز شریف نے انڈر پرفارمنگ کالجز سے متعلق رپورٹ بھی طلب کر لی۔اجلاس میں سی ایم پنجاب ہونہار سکالر شپ اور لیپ ٹاپ سکیم کے بارے میں تفصیلی بریفنگ دی گئی، جس میں بتایا گیا کہ پنجاب کے علاوہ دوسرے صوبوں کے 19 ہزار سے زائد طلبہ وزیراعلیٰ پنجاب لیپ ٹاپ سکیم میں اپلائی کر چکے ہیں۔دوران اجلاس ہائر ایجوکیشن کا سٹریٹجک پلان / روڈ میپ2025-29 ء کا بھی جائزہ لیا گیا، پبلک سیکٹر یونیورسٹیوں میں گورننس ریفارمز اور ادارہ جاتی خودمختاری لانے کی تجویز دی گئی، پنجاب کی یونیورسٹیوں میں تدریسی معیار اور تخلیقی علم پر زور دیا گیا۔اجلاس میں پنجاب کی یونیورسٹیوں میں انسانی وسائل کی ترقی پر توجہ دینا ترجیحات میں شامل کرنے پر اتفاق کیا گیا، یونیورسٹیوں میں ڈیجیٹل ٹرانسفارمیشن اور گلوبل روابط بھی ترجیحات میں شامل کی گئیں، پنجاب میں پہلی مرتبہ ہائر ایجوکیشن کانفرنس کے انعقاد کی اصولی منظوری دی گئی، وزیراعلیٰ مریم نواز شریف نے پنجاب میں غیر فعال کامرس کالجز سے متعلق بھی تفصیلی رپورٹ طلب کر لی۔
