پنجاب میں پہلی مرتبہ 90 روز میں 57913 نئے کاروبار شروع ہونے کا ریکارڈ بن گیا
وزیراعلیٰ پنجاب مریم نواز شریف نے تاریخ رقم کر دی، صرف 3 ماہ میں ایک لاکھ 7 ہزار سے زائد افراد کو 61 ارب روپے کے قرضے فراہم کر دیئے گئے۔پنجاب میں پہلی مرتبہ 90 روز میں 57913 نئے کاروبار شروع ہونے کا ریکارڈ بن گیا، نئے کاروبار شروع کرنے کیلئے 23 ارب 91 کروڑ روپے کے قرض جاری کئے گئے ہیں، پہلی مرتبہ 6753 خواتین نے کاروبار چلانے کیلئے 3 ارب 42 کروڑ روپے کے لون لے لئے۔
وزیراعلی پنجاب مریم نواز شریف کی زیر صدارت آسان کاروبار فنانس اور آسان کاروبار کارڈ سے متعلق خصوصی اجلاس منعقد ہوا، اجلاس میں آسان کاروبار فنانس اور آسان کاروبار کارڈ سے متعلق تفصیلی بریفنگ دی گئی، ایم ڈی پی ایس آئی سی سارہ عمر نے آسان کاروبار سکیم پر پیش رفت سے آگاہ کیا۔
بریفنگ میں بتایا گیا کہ چیف منسٹرآسان کاروبار فنانس سکیم کے تحت 3010 افراد کو 18 ارب روپے کے لون جاری کیے گئے ہیں، چیف منسٹر آسان کاروبار کارڈ سکیم کے تحت ایک لاکھ 4 ہزار افراد کو 43 ارب روپے کے قرض کا اجراء کیا گیا ہے۔
چیف منسٹر آسان کاروبارفنانس کے لئے 74579 درخواستیں موصول ہوئیں، 2505 درخواستیں منظور کی گئیں اور قرضے فراہم کیے گئے، چیف منسٹر آسان کاروبار فنانس فیز ٹو کے لئے 12029 درخواستیں موصول ہوئیں، 505 کو منظور کرتے ہوئے قرضے دیئے گئے، چیف منسٹر آسان کاروبار کارڈ سکیم کے لئے 1380838 درخواستیں موصول ہوئیں جبکہ 104133 منظور کی گئیں۔
ٹرانسپورٹیشن کاروبار کے لئے 1312 افراد نے 3 ارب 91 کروڑ روپے کے قرض حاصل کیے، ٹریڈنگ اینڈ ڈسٹری بیوشن کے لئے 175 افراد نے 3 ارب 94 کروڑ روپے کے قرض حاصل کیے، پروفیشن سروسز ایگری کلچر، ڈیری، فوڈ، بیوٹیشن، آٹو، فرٹیلائزر، پیسٹی سائیڈ اور دیگر کاروبار کے لئے بھی لون حاصل کرنے کا رحجان دیکھنے میں آیا۔
آسان کاروبا کارڈ کے ذریعے سروسز مہیا کرنے والے سب سے زیادہ 61996 افراد نے 26 ارب 13کروڑ روپے کے لون لیے، ٹریڈنگ کے لئے 24522 افراد نے 10 ارب 75 کروڑ روپے کے قرض حاصل کیے، ایگری سمال بزنس کے لئے 10699 افراد نے 3 ارب 69 کروڑ روپے کے قرض لیے۔
اس موقع پر وزیراعلیٰ پنجاب مریم نواز شریف نے آسان کاروبار فنانس اور کارڈ لون کیلئے زیر غور درخواستوں کا پراسس جلد مکمل کرنے کا حکم دے دیا۔وزیراعلیٰ کی ہدایت پر آسان کاروبار کارڈ اب واٹس ایپ کے ذریعے بھی ایکٹو کیا جا سکے گا، وزیراعلیٰ مریم نواز شریف نے ایکسپورٹ اور مینو فیکچرنگ سیکٹر لون کے لئے پلان طلب کر لیا۔وزیراعلیٰ نے ہدایت کی ہے کہ آسان کاروبار فنانس اور آسان کاروبار کارڈ پروگرام کسی صورت نہیں رکنا چاہیے۔
