کوئی شک میں نہ رہے، پاکستان کی خودمختاری پر حملہ کیا گیا تو جواب فیصلہ کن ہوگا، لیفٹیننٹ جنرل احمد شریف چوہدری
افواج نے عوام سے جو وعدہ کیا تھا وہ پورا کیا، وزیراعظم شہبازشریف اور وزرا ء کے مشکور ہیں جنہوں نے مشکل وقت میں اہم فیصلے کیے - ڈی جی آئی ایس پی آر کی پاک بحریہ اورپاک فضائیہ کے سینئر افسران کے ہمراہ پریس کانفرنس
ڈائریکٹر جنرل (ڈی جی) انٹر سروسز پبلک ریلیشنز (آئی ایس پی آر)لیفٹیننٹ جنرل احمد شریف چوہدری کا کہنا ہے کہ کوئی شک میں نہ رہے، پاکستان کی خودمختاری پر حملہ کیا گیا تو جواب فیصلہ کن ہوگا۔ افواج نے عوام سے جو وعدہ کیا تھا وہ پورا کیا، وطن کے دفاع میں جان دینے والے شہدا کو خراج عقیدت پیش کرتے ہیں، پاکستانی افواج اپنے غیور اور بہادر عوام کا شکریہ ادا کرتی ہیں، وزیراعظم شہبازشریف اور وزرا ء کے مشکور ہیں جنہوں نے مشکل وقت میں اہم فیصلے کیے۔
ڈی جی آئی ایس پی آر نے پاک بحریہ اورپاک فضائیہ کے سینئر افسران کے ہمراہ اہم پریس کانفرنس سے خطاب کرتے ہوئے بتایا کہ بھارت نے آزاد کشمیر کی سویلین آبادی کو بھاری ہتھیاروں سے نشانہ بنایا، بھارت کی جانب سے ڈرونز کے ذریعے پاکستانی فضائی حدود کی خلاف ورزی کی گئی، 6اور7مئی کو بھارتی جارحیت سے بچوں، خاتوں سمیت معصوم افراد شہید ہوئے، ہمارے دل اور ہمدردیاں شہدا کے اہلخانہ کے ساتھ ہیں۔
ڈی جی آئی ایس پی آر لیفٹیننٹ جنرل احمد شریف چوہدری کا کہنا ہے کہ الحمداللہ، افواج پاکستان نے قوم سے کیا گیا وعدہ نبھایا، بھارت نے جارحیت کرکے بے گناہ پاکستانیوں کا خون بہایا، بھارتی جارحیت کے خلاف پاکستان نے آپریشن بنیان مرصوص شروع کیا، اڑی نیٹ ورکس اسٹیشن اور پونچھ راڈار کو نشانہ بنایا، اللہ کا شکر ادا کرتے ہیں کہ اس نے فتح سے نوازا۔ لیفٹیننٹ جنرل احمد شریف چوہدری نے کہا کہ مسلح افواج نے عوام سے جو وعدہ کیا تھا وہ پورا کیا، وطن کے دفاع میں جان دینے والے شہدا کو خراج عقیدت پیش کرتے ہیں، پاکستانی افواج اپنے غیور اور بہادر عوام کا شکریہ ادا کرتی ہیں، وزیراعظم اور وزرا کے مشکور ہیں جنہوں نے مشکل وقت میں اہم فیصلے کیے۔
ڈی جی آئی ایس پی آر نے کہا کہ پاکستان کے خلاف آپریشن کرنے والی تمام جگہوں پر پاکستان نے جواب دیا، عوام، جوانوں اور سیاسی قیادت کے شکر گزار ہیں جو ریاست کیساتھ کھڑے ہوئے، سورت گڑھ، سرسہ، آدم پور، اونتی پورہ میں اہداف کو نشانہ بنایا، اودھم پور، پٹھان کوٹ میں بھی اہداف کو نشانہ بنایا گیا، دو مقامات پر بھارت کے ایس400بیٹری سسٹم کو کامیابی سے نشانہ بنایا، پاکستان نے اپنی وسیع تر ٹیکنالوجی میں سے کچھ کا تحمل کے ساتھ استعمال کیا، اس طرح کی بے شمار ٹیکنالوجی کی صلاحیتیں مستقبل میں بھی استعمال کی جا سکتی ہیں۔
لیفٹیننٹ جنرل احمد شریف چوہدری نے کہا کہ لائن آف کنٹرول پر ان فوجی تنصیبات کو نشانہ بنایا گیا جو آزاد کشمیر میں معصوم شہریوں پر حملے کر رہے تھے، پاکستان نے انتہائی مہارت، تحمل اور درستگی سے جواب دیا، پاکستان پر حملہ کرنے والی تمام جگہوں کو نشانہ بنایا گیا۔
ڈی جی آئی ایس پی آر نے کہا کہ بھارت پاکستان میں دہشتگردی میں ملوث ہے جس کے ثبوت بھی موجود ہیں، پاکستان نے کامیابی سے اڑی نیٹ ورکس اسٹیشن اور پونچھ راڈار کو نشانہ بنایا، پاکستان کیخلاف استعمال ہونے والے 26 بھارتی فوجی اہداف کو نشانہ بنایا گیا، بھارت نے ڈرونز کے ذریعے پاکستانی فضائی حدود کی خلاف ورزی کی، پاکستان کے تمام حملے انتہائی مہارت کے ساتھ کیے گئے تاکہ عام شہری نشانہ نہ بنیں۔ انہوں نے بتایا کہ بیاس اور نگروٹہ میں براہموس میزائلوں کے سٹوریج سٹیشنوں کو تباہ کیا گیا، بھارت کے جی ٹاپ میں 10اور نوشیرہ میں 80بریگیڈ کو تباہ کیا گیا۔
ڈی جی آئی ایس پی آر نے کہا کہ بھارتی فوج کے زیراستعمال سسٹم کو مفلوج کیا، پاکستان کی جانب سے بھرپور سائبر حملے بھی کیے گئے، پاکستان کا ردعمل درست، مناسب اور محدود تھا، ہم نے بتایا تھا کہ ہم جواب دیں گے، ہم نے بتایا تھا جواب ہماری مرضی، وقت اور جگہ کے تعین کے حساب سے ہوگا۔
میجر جنرل احمد شریف چودھری نے کہا کہ پاکستان نے فتح گائیڈڈ میزائل ون اور ٹو استعمال کیے، بھارتی، عالمی میڈیا نے بھی بھارتی دفاعی تنصیبات کو نشانہ بنانے کی تصدیق کی۔
