وزیر اعلیٰ پنجاب کی ہر ضلع میں گرلز اور بوائز نواز شریف سکول بنانے کی ہدایت
وزیرِ اعلیٰ پنجاب مریم نواز کا کہنا ہے کہ بچوں کی تعلیم کے لیے بہت سا کام کرنا چاہتی ہوں، سکولوں میں سولر سسٹم کی تنصیب کے لیے اقدامات کیے جارہے ہیں۔ مریم نواز کی زیر صدارت اجلاس میں سکول ایجوکیشن کے موجودہ اور مجوزہ منصوبوں پر بریفنگ دی گئی۔ بریفنگ میں بتایا گیا کہ پنجاب میں11ہزار سے زائد سکولوں کی آؤٹ سورسنگ مکمل ہو گئی ہے۔ بریفنگ میں مزید بتایا گیا کہ اگلے مالی سال میں 250 اسکولوں کی اپ گریڈیشن ہوگی اور پنجاب کی 10تحصیلوں میں 300 ٹیک ایڈ سکول بنیں گے۔ بریفنگ میں بتایا گیا کہ نواز شریف سکول آف ایمیننس میں آئی ٹی اور سائنس لیب ہوگی، لائبریری، ملٹی پرپز پلے گراؤنڈ اور دیگر جدید سہولتیں بھی ہوں گی۔ مریم نواز نے وزیر تعلیم پنجاب کو 11 لاکھ بچوں کی انرولمنٹ پر شاباش دیتے ہوئے سکول مینجمنٹ کونسل کو 90 روز میں سہولتوں کی فراہمی یقینی بنانے کی ہدایت کی۔اُنہوں نے ایک سال کے اندر سکولوں میں درکار کلاس روم بنانے کا حکم دیا اور ساتھ ہی سکولوں کی 580 بوسیدہ اور 2770 خستہ عمارتوں کی تعمیر و مرمت کی ہدایت کی۔ وزیرِ اعلیٰ پنجاب نے 5 لاکھ بچوں کی انگلش ٹرینرز سے سپوکن انگلش ٹریننگ کا ہدف مقرر کیا اور سکول میل پروگرام کا دائرکار وسیع کرنے کی بھی ہدایت دی۔ اُنہوں نے ہر ضلع میں گرلز اور بوائز کے لیے نواز شریف سکول بنانے کی ہدایت بھی کی اور 5 سال میں 1750 سکولوں کی اپ گریڈیشن کا ہدف مقرر کیا۔
