یوسف رضا گیلانی کا پاکستان پرتگال کے اعلیٰ سطحی روابط کو فروغ دینے پر زور
قائمقام صدر سید یوسف رضا گیلانی نے کہا ہے کہ پاکستان اور پرتگال کے درمیان گہرے دوستانہ تعلقات باہمی احترام اور اعتماد پر مبنی ہیں۔ پرتگال سفیر مانوئل فریڈریکو پنہیرو دا سلوا نے ایوان صدر میں قائم مقام صدرسے ملاقات کی جس میں دو طرفہ تعاون اور اہم امورپر تبادلہ خیال کیاگیا۔
انہوں نے تعلقات کو مزید وسعت دینے پر زور دیتے ہوئے کہا کہ بلیو اکانومی، گرین اکانومی، زراعت، تجارت، کھیل، آئی ٹی اور دیگر شعبے سرمایہ کاری اور تعاون کے لیے بے پناہ مواقع فراہم کرتے ہیں۔
یوسف رضا گیلانی نے دونوں ممالک کے درمیان پارلیمانی وفود کے تبادلوں اور اعلیٰ سطحی روابط کو فروغ دینے کی ضرورت پر زور دیا تاکہ دوطرفہ تعلقات کو مزیدتحکم کیا جا سکے۔ انہوں نے پرتگال کے صدر کو پاکستان کے دورے کی دعوت دیتے ہوئے کہا کہ پاکستان کے وزیر خارجہ/نائب وزیر اعظم پہلے ہی اپنے پرتگالی ہم منصب کو دورے کی دعوت دے چکے ہیں۔ انہوں نے اس امید کا اظہار کیا کہ اعلیٰ سطحی روابط دوطرفہ تعلقات کو مزید مضبوط کریں گے۔
انہوں نے اس بات پر بھی روشنی ڈالی کہ پاکستان اور پرتگال بین الپارلیمانی یونین (IPU) اور دیگر عالمی فورمز پر ایک دوسرے کے ساتھ قریبی تعاون کر رہے ہیں، جو اس بات کا مظہر ہے کہ دونوں ممالک اپنے تعلقات کو بے حد اہمیت دیتے ہیں۔ انہوں نے مزید کہا کہ دونوں ممالک کئی عالمی معاملات پر یکساں موقف رکھتے ہیں اور اقوام متحدہ سمیت کثیرالجہتی فورمز پر بھی قریبی تعاون رکھتے ہیں۔
جناب گیلانی نے کہا کہ پاکستان جی ایس پی پلس اسٹیٹس کو انتہائی قدر کی نگاہ سے دیکھتا ہے اور امید کرتا ہے کہ پرتگال آئندہ جی ایس پی پلس اسکیم میں پاکستان کی حمایت جاری رکھے گا۔ انہوں نے پرتگالی سفیر کو اسپیشل انویسٹمنٹ فسیلیٹیشن کونسل (SIFC) کے بارے میں بھی آگاہ کیا، جو غیر ملکی سرمایہ کاروں کے لیے کان کنی، توانائی، زراعت اور دفاعی تعاون جیسے کلیدی شعبوں میں سرمایہ کاری کے لیے ون ونڈو آپریشن فراہم کرتی ہے۔ انہوں نے پرتگالی کمپنیوں کو ان شعبوں میں سرمایہ کاری کی دعوت دی۔
انہوں نے کہا کہ پاکستان کے پاس مختلف شعبوں میں مہارت رکھنے والے نوجوانوں کی بڑی تعداد موجود ہے، اس لیے لیبر موبیلیٹی پارٹنرشپ کے حوالے سے ایک معاہدے کی ضرورت ہے تاکہ اس شعبے میں قانونی تعاون کو فروغ دیا جا سکے۔ مزید برآں، پہلے سے دستخط شدہ مفاہمتی یادداشتوں (MOUs) پر عملدرآمد کی ضرورت پر بھی زور دیا۔
قائم مقام صدر گیلانی نے پرتگالی سفیر سے سفارتی اور سرکاری پاسپورٹ رکھنے والوں کے لیے ویزہ کی چھوٹ کے دوطرفہ معاہدے کو حتمی شکل دینے پرزور دیا۔ انہوں نے اس بات پر بھی اطمینان کا اظہار کیا کہ پرتگال میں مقیم پاکستانیوں کی تعداد میں اضافہ ہو رہا ہے اور وہ دونوں ممالک کے درمیان عوامی سطح پر تعلقات کو مضبوط بنانے میں اہم کردار ادا کر سکتی ہے۔
اس موقع پر،جناب گیلانی نے مرحوم پرنس کریم آغا خان چہارم کو زبردست خراج عقیدت پیش کیا اور معیشت، ہاسپیٹیلٹی، صحت، تعلیم اور پسماندہ طبقات کے لیے ان کی سماجی خدمات کو سراہا۔
پرتگالی سفیر نے قائم مقام صدر کے خیالات کو سراہتے ہوئے کہا کہ پرتگال پاکستان کے ساتھ دوطرفہ تعلقات کو انتہائی اہمیت دیتا ہے اور دونوں ممالک کے درمیان باہمی تعاون سے یہ رشتہ مزید مستحکم ہوگا۔
آخر میں، قائم مقام صدر نے پرتگالی سفیر کو ملتان کے دورے اور ملتان چیمبر آف کامرس اینڈ انڈسٹری سے ملاقات کی دعوت دی، تاکہ باہمی تعاون کے مواقع تلاش کیے جا سکیں۔
