ملک میں خریف سیزن کے لیے یوریا کھاد کا وافر ذخیرہ موجود ہے، رانا تنویر

وزیر صنعت و پیداوار رانا تنویر حسین کا کہنا ہے کہ ملک میں خریف سیزن کے لیے یوریا کھاد کا وافر ذخیرہ موجود ہے۔اسلام آباد میں ایک اجلاس کی صدارت کرتے ہوئے انہوں نے کہا کہ یوریا کی قیمتوں میں اضافے سے متعلق شکایات موصول کرنے کے لیے ٹول فری نمبرز متعارف کرانے کا فیصلہ کیا گیا ہے۔

انہوں نے کہا کہ ربیع سیزن سے ملک بھر میں قیمتوں کے تعین کا ایک متفقہ طریقہ کار نافذ کیا جائے گا۔ انہوں نے کہا کہ ملک بھر میں خوردہ قیمت یکساں ہونی چاہیے۔رانا تنویر نے کہا کہ صوبے اور کمپنیاں یوریا کی قیمتوں کی نگرانی کریں۔

وفاقی وزیر نے پاکستان اسٹینڈرڈز اینڈ کوالٹی کنٹرول اتھارٹی کو کھاد کمپنیوں کی ویلیو ایڈڈ یوریا مصنوعات کو چیک کرنے کی ہدایت کی۔فرٹیلائزر کمپنیوں کے نمائندوں نے کہا کہ تمام مینوفیکچرنگ یونٹ یوریا کی مقامی طلب کو پورا کرنے کے لیے پوری صلاحیت سے کام کریں گے۔