پاکستان اور سری لنکا کے درمیان دوسرا ٹیسٹ میچ لاہور سے راولپنڈی منتقل

پاکستان کرکٹ بورڈ (PCB) نے پاکستان اور سری لنکا کے درمیان دوسرے ٹیسٹ میچ کا مقام تبدیل کرنے کا اعلان کردیا ہے۔

پی سی بی کے ترجمان کے مطابق لاہور میں اسموگ کی بڑھتی ہوئی سطح اور موجودہ موسمی صورتحال کے پیش نظر دوسرا ٹیسٹ میچ لاہور کے بجائے راولپنڈی منتقل کرنے کا فیصلہ کیا گیا ہے۔

شیڈول کے مطابق دوسرا ٹیسٹ میچ 17 سے 21 نومبر تک لاہور میں کھیلا جانا تھا، تاہم اب یہ مقابلہ انہی تاریخوں میں راولپنڈی کرکٹ اسٹیڈیم میں منعقد ہوگا۔

پی سی بی کے مطابق یہ فیصلہ کھلاڑیوں اور میچ کے لیے موزوں موسمی حالات کو مدنظر رکھتے ہوئے کیا گیا ہے۔