متحدہ عرب امارات کے دارالحکومت ابو ظہبی میں جاری 2026 ورلڈ جوجِٹسو چیمپئن شپ میں پاکستان کے ایتھلیٹس نے شاندار کارکردگی کا مظاہرہ کرتے ہوئے عالمی سطح پر ملک کا نام روشن کر دیا۔
سابق ایشین چیمپئنز ابو ہریرہ اور محمد عمار نے ماسٹرز کیٹیگری میں شاندار کھیل پیش کرتے ہوئے ڈیو اور ڈیو شو ایونٹس میں دو تاریخی گولڈ میڈلز جیت لیے۔ ورلڈ چیمپئن شپ کی ماسٹرز کیٹیگری میں پاکستان کی یہ پہلی شرکت تھی، جس میں قومی ایتھلیٹس نے اپنے پہلے ہی ایونٹ میں دو گولڈ میڈلز حاصل کر کے تاریخ رقم کر دی۔
دوسری جانب نوجوان کھلاڑی محمد یوسف اور محمد عمر نے بہترین مہارت، شاندار تکنیک اور زبردست ٹیم ورک کا مظاہرہ کرتے ہوئے انڈر 21 ڈیو کیٹیگری میں برونز میڈل جیت کر پاکستان کے لیے ایک اور اعزاز حاصل کیا۔
محمد یوسف اور محمد عمر کل ڈیو شو کیٹیگری میں بھی پاکستان کی نمائندگی کریں گے۔ قوم کو امید ہے کہ دونوں نوجوان ایتھلیٹس اپنی بہترین صلاحیتوں کا مظاہرہ کرتے ہوئے ایک بار پھر پاکستان کا پرچم بلند کریں گے اور مزید کامیابی حاصل کریں گے۔
یہ چیمپئن شپ 1 سے 9 اگست 2026 تک مبادلہ ایرینا، ابو ظہبی میں جاری ہے، جس میں دنیا بھر سے 1,500 سے زائد ایتھلیٹس ماسٹرز، سینئر اور یوتھ کیٹیگریز میں حصہ لے رہے ہیں۔
پاکستان جوجِٹسو فیڈریشن کے چیئرمین خلیل احمد خان نے میڈلسٹ ایتھلیٹس کو مبارک باد دیتے ہوئے کہا:
“ابو ہریرہ اور محمد عمار کے دو گولڈ میڈلز اور محمد یوسف و محمد عمر کا برونز میڈل پاکستان کے لیے ایک قابلِ فخر کامیابی ہے۔ یہ کامیابیاں ہمارے ایتھلیٹس کی محنت، عزم اور صلاحیتوں کا ثبوت ہیں۔”
پاکستان جوجِٹسو فیڈریشن کے سیکریٹری جنرل طارق علی نے کہا:
“یہ تاریخی کامیابیاں پاکستان جوجِٹسو کے روشن مستقبل کی عکاس ہیں۔ ہمارے سینئر اور نوجوان ایتھلیٹس نے ثابت کیا ہے کہ پاکستان عالمی سطح پر بہترین کارکردگی دکھانے کی صلاحیت رکھتا ہے۔”
پاکستان جوجِٹسو فیڈریشن نے ابو ہریرہ، محمد عمار، محمد یوسف اور محمد عمر کو ان کی شاندار کامیابیوں پر مبارک باد دی اور قومی ٹیم کے دیگر کھلاڑیوں کے لیے نیک خواہشات کا اظہار کیا۔
-
-
-
-
-
-
