وفاقی وزیر برائے اقتصادی امور احد چیمہ نے کہا ہے کہ حکومت ملک بھر میں عوام کو سستی اور تیز رفتار انٹرنیٹ سہولیات کی فراہمی یقینی بنانے کے لیے تمام ضروری اقدامات کرے گی۔
انہوں نے اسلام آباد میں وفاقی وزیر برائے آئی ٹی و ٹیلی کام شزا فاطمہ خواجہ کے ہمراہ ایک اجلاس کی مشترکہ صدارت کرتے ہوئے کہا کہ حکومت کی اولین ترجیح دور دراز علاقوں میں رہنے والے فری لانسرز، ای کامرس کاروباری افراد اور دیگر ڈیجیٹل شعبے سے وابستہ پیشہ ور افراد کو بہتر انٹرنیٹ سہولیات فراہم کرنا ہے، جو سست اور غیر معیاری انٹرنیٹ کے باعث مشکلات کا سامنا کر رہے ہیں۔
احد چیمہ نے کہا کہ تمام متعلقہ فریقین سے مشاورت کے بعد نیشنل کنیکٹیویٹی پلان کو جلد از جلد حتمی شکل دی جائے گی۔
اجلاس میں دیہات، دور افتادہ علاقوں اور چھوٹے شہروں تک تیز رفتار انٹرنیٹ کی رسائی بڑھانے، ڈیجیٹل خلیج کو کم کرنے اور نئی معاشی مواقع پیدا کرنے پر تفصیلی غور کیا گیا۔
اجلاس میں اس بات پر بھی زور دیا گیا کہ نئی نسل کے فائبر ٹو دی ہوم (FTTH) نیٹ ورکس اور 5G انفراسٹرکچر قومی اقتصادی ترقی، روزگار کے نئے مواقع اور ملک بھر میں ڈیجیٹل شمولیت کو فروغ دینے میں اہم کردار ادا کریں گے۔
-
-
-
-
-
-
