فیفا ورلڈ کپ، انگلینڈ اور ارجنٹائن سیمی فائنل میں مدمقابل آگئیں

انگلینڈ اور ارجنٹائن نے سنسنی خیز کوارٹر فائنلز میں بالترتیب ناروے اور سوئٹزرلینڈ کو شکست دے کر فیفا ورلڈ کپ 2026 کے سیمی فائنل کے لیے کوالیفائی کر لیا، جہاں اب دونوں ٹیمیں ایک دوسرے کے مدمقابل ہوں گی۔

انگلینڈ نے میامی میں کھیلے گئے دلچسپ کوارٹر فائنل میں ناروے کو اضافی وقت میں 1-2 سے شکست دی۔ اسٹار مڈفیلڈر جوڈ بیلنگھم نے شاندار کھیل کا مظاہرہ کرتے ہوئے دونوں گول اسکور کیے اور اپنی ٹیم کو سیمی فائنل میں پہنچا دیا۔

ناروے نے میچ کے 36ویں منٹ میں اینڈریاس شیلڈروپ کے ذریعے برتری حاصل کی، تاہم پہلے ہاف کے اضافی وقت میں بیلنگھم نے برابر کا گول کر دیا۔ اضافی وقت کے آغاز میں انہوں نے دوسرا گول کرکے انگلینڈ کی فتح یقینی بنا دی۔

اس کامیابی کے ساتھ انگلینڈ نے 1966 میں عالمی چیمپئن بننے کے بعد تیسری مرتبہ ورلڈ کپ کے سیمی فائنل میں جگہ بنائی ہے اور اب وہ چھ دہائیوں بعد پہلی بار فائنل تک رسائی حاصل کرنے کی امید رکھتا ہے۔

دوسری جانب کینساس سٹی میں دفاعی چیمپئن ارجنٹائن نے سوئٹزرلینڈ کو اضافی وقت میں 1-3 سے شکست دے کر سیمی فائنل میں رسائی حاصل کی۔

ارجنٹائن نے میچ کے دسویں منٹ میں الیکسس میک ایلسٹر کے گول سے برتری حاصل کی، تاہم سوئٹزرلینڈ کے ڈین اینڈوئے نے دوسرے ہاف میں مقابلہ برابر کر دیا۔

میچ کا اہم موڑ اس وقت آیا جب سوئس اسٹرائیکر بریل ایمبولو کو وی اے آر جائزے کے بعد ڈائیونگ پر دوسرا پیلا کارڈ دکھا کر میدان سے باہر بھیج دیا گیا، جس کے بعد سوئٹزرلینڈ 10 کھلاڑیوں تک محدود ہو گیا۔

عددی برتری کا فائدہ اٹھاتے ہوئے جولیان الواریز نے اضافی وقت میں شاندار لانگ رینج گول اسکور کیا، جبکہ لاوتارو مارٹینیز نے آخری لمحات میں تیسرا گول کرکے ارجنٹائن کی فتح پر مہر ثبت کر دی۔

اب ورلڈ کپ 2026 کے سیمی فائنل میں انگلینڈ اور ارجنٹائن کے درمیان ایک بڑا اور سنسنی خیز مقابلہ ہوگا، جہاں دونوں ٹیمیں فائنل میں جگہ بنانے کے لیے میدان میں اتریں گی۔