چین کے دارالحکومت بیجنگ میں 32ویں بیجنگ انٹرنیشنل بک فیئر 2026 کا آغاز ہوگیا، جس میں متحدہ عرب امارات مہمانِ خصوصی ملک کے طور پر شریک ہے۔ یہ شرکت چین اور یو اے ای کے درمیان بڑھتے ہوئے ثقافتی اور فکری تعلقات کی عکاسی کرتی ہے۔
افتتاحی تقریب میں متحدہ عرب امارات کے وزیر ثقافت شیخ سالم بن خالد القاسمی، چین میں یو اے ای کے سفیر حسین بن ابراہیم الحمادی، نائب وزیر ثقافت مبارک النہیان سمیت اعلیٰ حکام اور ثقافتی شخصیات نے شرکت کی۔
میلے کی ایک نمایاں تقریب میں متحدہ عرب امارات یونیورسٹی کے اسکول آف ہیومینٹیز اینڈ سوشل سائنسز کے ڈین پروفیسر محمد موسیٰ محمد بن حویدن کو ثقافتی اور علمی تبادلوں کے فروغ میں خدمات کے اعتراف میں ’’چائنیز بکس اسپیشل کنٹری بیوشن ایوارڈ‘‘ سے نوازا گیا۔
متحدہ عرب امارات نے ’’یو اے ای ہاؤس‘‘ پویلین کے ذریعے اپنی ثقافتی شناخت کو اجاگر کیا، جہاں ادب، ترجمہ، اشاعت اور تخلیقی صنعتوں سے متعلق مختلف نمائشوں اور سرگرمیوں کا انعقاد کیا گیا۔
میلے کے دوران بچوں کے لیے کہانی سنانے کی نشستیں، تخلیقی ورکشاپس اور روایتی العیالہ رقص کی پرفارمنسز بھی پیش کی گئیں، جنہوں نے چینی عوام کو اماراتی ثقافت سے روشناس کرایا۔
اس موقع پر چین-یو اے ای میڈیا ڈائیلاگ اور یو اے ای لٹریری نائٹ کا بھی انعقاد کیا گیا، جن کا مقصد صحافت، ادبی روابط، مشترکہ رپورٹنگ اور ثقافتی تبادلوں کو فروغ دینا تھا۔
حکام کے مطابق مہمانِ خصوصی ملک کے طور پر یو اے ای کی شرکت دونوں ممالک کے درمیان جامع اسٹریٹجک شراکت داری کی مضبوط بنیادوں اور عوامی روابط کے فروغ میں ثقافت کے اہم کردار کی عکاس ہے۔
-
-
-
-
-
-
