مشرقِ وسطیٰ میں جنگ بندی پاکستان کا کردار قابلِ فخر ہے، وزیر دفاع
وزیرِ دفاع خواجہ محمد آصف نے مشرقِ وسطیٰ میں جنگ بندی کے قیام میں پاکستان کے کردار کو ملکی تاریخ کا ایک قابلِ فخر اور باوقار لمحہ قرار دیا ہے۔
ایران اور امریکہ کے درمیان ہونے والی جنگ بندی پر قومی اسمبلی میں بحث کے دوران انہوں نے کہا کہ اس سفارتی کامیابی سے عالمی سطح پر پاکستان کا وقار بلند ہوا ہے۔ ان کا کہنا تھا کہ یورپی یونین سمیت مسلم ممالک اور دیگر دوست ممالک شہباز شریف اور فیلڈ مارشل سید عاصم منیر کی کاوشوں کو سراہ رہے ہیں۔
وزیرِ دفاع نے امید ظاہر کی کہ خطے میں امن قائم ہوگا، آبنائے ہرمز دوبارہ کھل جائے گی اور تیل کی قیمتوں میں کمی آئے گی۔
اس موقع پر وزیرِ قانون اعظم نذیر تارڑ نے کہا کہ پاکستان خطے میں امن، استحکام اور سلامتی کا خواہاں ہے۔ انہوں نے قومی اتحاد پر زور دیتے ہوئے اپوزیشن سے مطالبہ کیا کہ اسلام آباد میں ہونے والے آئندہ مذاکرات کے پیشِ نظر اپنے احتجاجی پروگرام پر نظرِ ثانی کرے۔
انہوں نے ایوان کو آگاہ کیا کہ وزیراعظم شہباز شریف کل قومی اسمبلی کو موجودہ علاقائی صورتحال اور پاکستان کی سفارتی کوششوں پر بریفنگ دیں گے۔ وزیرِ قانون کی تجویز پر ایوان نے وقفۂ سوالات مؤخر کر دیا۔
اپوزیشن لیڈر محمود خان اچکزئی نے پاکستان کی سفارتی کامیابی پر خوشی کا اظہار کرتے ہوئے حکومت کو غیر مشروط تعاون کی یقین دہانی کرائی۔
رکن اسمبلی علی محمد خان نے کہا کہ پاکستانی عوام ایران اور سعودی عرب کے ساتھ کھڑے ہیں اور پاکستان مسلم ممالک کے درمیان اتحاد کا خواہاں ہے۔
سابق وزیراعظم راجہ پرویز اشرف نے اس دن کو پاکستان کی تاریخ کا اہم دن قرار دیتے ہوئے چیلنجز سے نمٹنے کے لیے اجتماعی کوششوں کی ضرورت پر زور دیا۔
وفاقی وزیر صحت سید مصطفیٰ کمال نے جنگ بندی کو بڑی سفارتی کامیابی قرار دیتے ہوئے اندرونی استحکام کو یقینی بنانے کی ضرورت پر زور دیا۔
چیئرمین پی ٹی آئی گوہر علی خان نے جنگ بندی کا خیرمقدم کرتے ہوئے کہا کہ پاکستان مشرقِ وسطیٰ میں دیرپا امن کا خواہاں ہے اور امید ظاہر کی کہ یہ جنگ بندی مستقل شکل اختیار کرے گی۔ انہوں نے کل ہونے والا اپوزیشن کا جلسہ بھی مؤخر کرنے کا اعلان کیا۔
وزیرِ سرمایہ کاری قیصر احمد شیخ نے توقع ظاہر کی کہ جنگ کے خاتمے کے بعد تیل کی قیمتوں میں کمی اور پاکستان میں سرمایہ کاری میں اضافہ ہوگا۔ انہوں نے وزیراعظم شہباز شریف اور فیلڈ مارشل عاصم منیر کو نوبیل امن انعام کے لیے نامزد کرنے کی تجویز بھی دی۔
اجلاس سے دیگر ارکان نے بھی خطاب کیا اور خطے میں امن کے لیے پاکستان کے کردار کو سراہا۔
