نائب وزیراعظم اسحاق ڈار کے قطر اور بنگلہ دیش سے اہم رابطے، دوطرفہ تعاون کے فروغ پر اتفاق
نائب وزیراعظم اور وزیر خارجہ اسحاق ڈار نے قطر کے وزیر مملکت ڈاکٹر محمد بن عبدالعزیز الخلیفی اور بنگلہ دیش کے خارجہ مشیر محمد توحید حسین سے علیحدہ علیحدہ ٹیلیفونک رابطے کیے، جن میں دوطرفہ تعلقات، علاقائی صورتحال اور عالمی امور پر تبادلۂ خیال کیا گیا۔
قطر کے وزیر مملکت ڈاکٹر محمد بن عبدالعزیز الخلیفی سے گفتگو کے دوران دونوں رہنماؤں نے پاکستان اور قطر کے درمیان دوطرفہ تعاون، باہمی دلچسپی کے اہم امور اور موجودہ عالمی و علاقائی پیش رفت پر تفصیلی تبادلۂ خیال کیا۔ اس موقع پر دونوں ممالک کے تعلقات کو مزید مضبوط بنانے کے عزم کا اعادہ کیا گیا۔
دوسری جانب نائب وزیراعظم اسحاق ڈار نے بنگلہ دیش کے خارجہ امور کے مشیر محمد توحید حسین سے ٹیلیفون پر بات چیت کی، جس میں پاکستان اور بنگلہ دیش کے دوطرفہ تعلقات کا جائزہ لیا گیا۔ گفتگو میں تجارت، اقتصادی تعاون اور مختلف شعبوں میں اشتراک کو فروغ دینے پر اتفاق کیا گیا۔
دونوں رہنماؤں نے علاقائی اور بین الاقوامی صورتحال پر بھی خیالات کا تبادلہ کیا اور اس امر پر زور دیا کہ مشترکہ مفادات کے فروغ، علاقائی امن اور خوشحالی کے لیے مسلسل رابطہ اور تعاون نہایت ضروری ہے۔
