سیکیورٹی فورسز نے کالات میں چار بھارتی حمایت یافتہ دہشتگرد ہلاک کر دیے
بلوچستان کے ضلع کالات میں انٹیلی جنس معلومات کی بنیاد پر کارروائی کے دوران چار بھارتی حمایت یافتہ دہشتگرد ہلاک ہو گئے۔پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے بھارتی پراکسی تنظیم فتنۂ ہندستان کے دہشتگردوں کی موجودگی کی اطلاع پر کارروائی کی۔
کارروائی کے دوران سیکیورٹی فورسز نے دہشتگردوں کے ٹھکانوں کو مؤثر انداز میں نشانہ بنایا اور شدید فائرنگ کے تبادلے کے بعد چار بھارتی حمایت یافتہ دہشتگرد مارے گئے۔دہشتگردوں سے اسلحہ، گولہ بارود اور دھماکہ خیز مواد بھی برآمد ہوا، جو علاقے میں مختلف دہشتگرد سرگرمیوں میں ملوث تھے۔
علاقے میں دیگر ممکنہ بھارتی حمایت یافتہ دہشتگردوں کی موجودگی ختم کرنے کے لیے صفائی مہم جاری ہے۔وفاقی ایگزیکٹو کمیٹی کی منظور شدہ نیشنل ایکشن پلان کے تحت سیکیورٹی فورسز اور قانون نافذ کرنے والے ادارے اپنی "عزمِ استحکام” مہم کے تحت ملک سے غیر ملکی حمایت یافتہ دہشتگردی کے خاتمے کے لیے بھرپور کارروائیاں جاری رکھیں گے۔
