پاکستان نے سری لنکا میں سمندری طوفان سے متاثرہ افراد کی امداد کے لیے اپنی کارروائیاں مزید تیز کر دی ہیں۔ وزیراعظم محمد شہباز شریف کی خصوصی ہدایات پر آج صبح ایک خصوصی سرچ اینڈ ریسکیو ٹیم سری لنکا کے متاثرہ علاقوں میں امدادی سرگرمیوں میں حصہ لینے کے لیے روانہ کی گئی۔

پاک فضائیہ کے سی-130 طیارے کے ذریعے روانہ کی گئی اس ٹیم میں 47 ارکان شامل ہیں، جبکہ 6.5 ٹن ضروری سامان بھی ساتھ بھیجا گیا ہے جو انسانی زندگیوں کے تحفظ اور امدادی کاموں میں استعمال ہوگا۔

امدادی سامان کی روانگی کے موقع پر وفاقی وزیر ڈاکٹر طارق فضل چوہدری، چیئرمین این ڈی ایم اے لیفٹیننٹ جنرل انعام حیدر ملک اور سری لنکا کے ہائی کمشنر فریڈ سینی ویراتھنے بھی موجود تھے۔ اس موقع پر ڈاکٹر طارق فضل چوہدری نے کہا کہ این ڈی ایم اے پاکستان سمیت بیرون ملک متاثرہ ممالک میں بھی قدرتی آفات کے اثرات کم کرنے اور بروقت ردعمل کے لیے پوری طرح پرعزم ہے۔

سری لنکن ہائی کمشنر نے پاکستان کی بروقت امداد اور مشکل وقت میں سری لنکا کے عوام کی مدد پر حکومتِ پاکستان اور پاکستانی عوام کا تہہ دل سے شکریہ ادا کیا۔

این ڈی ایم اے نے کولمبو اور لاہور کے درمیان چلنے والی سری لنکن ایئرلائنز کی پروازوں کے ذریعے مزید امدادی سامان بھجوانے کا بھی انتظام کیا ہے۔ کل وزیراعظم کی خصوصی ہدایت پر این ڈی ایم اے نے 200 ٹن امدادی سامان سمندری راستے کے ذریعے سری لنکا روانہ کیا تھا۔

امدادی سامان میں خیمے، کمبل، رضائیاں، لائف جیکٹس، ربڑ کی کشتیاں، ڈی واٹرنگ پمپس، لالٹینیں، چٹائیاں، مچھر دانیاں، بچوں کا خشک دودھ، تیار کھانے اور ضروری ادویات شامل ہیں۔ پاک بحریہ کے جہاز اور ہیلی کاپٹر پہلے ہی سری لنکا میں امدادی کاموں میں سرگرم ہیں۔

سری لنکا کے صدر کی جانب سے وزیراعظم پاکستان کو کی گئی خصوصی درخواست کے بعد این ڈی ایم اے نے متاثرہ علاقوں میں رسائی کی بحالی کے لیے پاک فوج کے عارضی پل بھی بھیجنے کا فیصلہ کیا ہے، تاکہ وہاں بحالی کے کاموں میں مزید تیزی لائی جا سکے۔

اشتہار