پاکستان اور مصر کا تمام شعبوں میں دوطرفہ تعلقات مزید گہرے کرنے کا عزم
پاکستان اور مصر نے تجارت، سرمایہ کاری، سکیورٹی، زراعت اور عوامی روابط سمیت تمام شعبوں میں اپنے دوطرفہ تعلقات کو مزید مستحکم اور وسعت دینے کے عزم کا اعادہ کیا ہے۔
یہ اتفاقِ رائے اسلام آباد میں پاکستان کے نائب وزیراعظم اسحاق ڈار اور مصر کے وزیر خارجہ ڈاکٹر بدر عبدالاطی کے درمیان ہونے والی ملاقات میں ہوا۔
مشترکہ پریس اسٹیک آؤٹ میں اسحاق ڈار نے بتایا کہ ملاقات میں دوطرفہ تجارت کے امکانات بڑھانے اور کاروباری برادری کے درمیان روابط مضبوط بنانے پر خصوصی توجہ دی گئی۔ انہوں نے کہا کہ پاکستان معیشت کے کلیدی شعبوں سے تعلق رکھنے والے 250 کاروباری اداروں کی فہرست مصر کے ساتھ شیئر کرے گا، جنہیں مصر کی جانب سے سہولت کاری اور تعاون فراہم کیا جائے گا۔ اس فہرست کے چھ ماہ بعد مزید 250 اداروں کی فہرست بھی فراہم کی جائے گی، جس سے دونوں ممالک کے درمیان مجموعی طور پر 500 کاروباری اداروں کا تعاون ممکن ہوسکے گا۔
نائب وزیراعظم نے بتایا کہ نجی شعبے میں تعاون کو ادارہ جاتی شکل دینے کے لیے پاک مصر بزنس کونسل قائم کی جائے گی، جب کہ پاک مصر بزنس فورم بھی جلد قائم کیا جائے گا تاکہ کاروباری سطح پر روابط کو فروغ دیا جاسکے۔
تعلیم اور عوامی روابط کے شعبے میں اسحاق ڈار نے بتایا کہ مصر نے معروف جامعہ الازہر میں پاکستانی طلبہ کے لیے اسکالرشپس کی تعداد دوگنا کرنے پر آمادگی ظاہر کی ہے۔
مصر کے وزیر خارجہ ڈاکٹر بدر عبدالاطی نے اس موقع پر پاکستان کے ساتھ دیرینہ برادرانہ تعلقات کو سراہا اور تمام شعبوں میں شراکت داری مزید بڑھانے کے عزم کا اعادہ کیا۔ انہوں نے پاکستان میں حالیہ دہشت گردی کے واقعات میں قیمتی جانوں کے ضیاع پر تعزیت بھی کی۔
مصر کے وزیر خارجہ نے کہا کہ ان کا ملک زراعت، تجارت و سرمایہ کاری، دواسازی، صحتِ عامہ اور انتہاپسندی کے خاتمے کے شعبوں میں پاکستان کے ساتھ ہر ممکن تعاون کے لیے تیار ہے۔
