فلسطینی عوام سے یکجہتی کا عالمی دن آج ملک بھر میں منایا جا رہا ہے

فلسطینی عوام سے یکجہتی کا عالمی دن آج ملک بھر میں منایا جا رہا ہے۔اس موقع پر اپنے الگ الگ پیغامات میں صدر آصف علی زرداری اور وزیرِاعظم محمد شہباز شریف نے اس عزم کا اعادہ کیا کہ پاکستان ہر سطح پر فلسطینی عوام کے ساتھ مضبوطی سے کھڑا ہے۔صدرِ مملکت نے کہا کہ پاکستان کی فلسطینیوں کے لیے حمایت انسانی وقار، انصاف اور مساوات جیسے عالمگیر اصولوں پر مبنی ہے۔
انہوں نے کہا کہ پاکستان نے ہمیشہ غزہ میں اسرائیلی قابض افواج کے مظالم کی کھل کر مذمت کی ہے اور ہر بین الاقوامی فورم پر فلسطینیوں کی آواز بلند کی ہے۔
انہوں نے مزید کہا کہ پاکستان اپنے فلسطینی بھائیوں اور بہنوں کو سیاسی، سفارتی، انسانی اور اخلاقی سطح پر ہر ممکن تعاون جاری رکھے گا۔وزیرِاعظم شہباز شریف نے اپنے پیغام میں کہا کہ فلسطینی عوام نے دہائیوں سے ہمارے دورِ حاضر کے بدترین سانحات کا سامنا کیا ہے۔
انہوں نے کہا کہ فلسطینی عوام کی ثابت قدمی اس حقیقت کا ثبوت ہے کہ انسانیت کا حوصلہ اور عزم ظلم کے مقابلے میں کبھی جھکتا نہیں۔وزیرِاعظم نے کہا کہ پاکستان فلسطین کے مسئلے کے منصفانہ، دیرپا اور جامع حل کے لیے پرعزم ہے، جو متعلقہ اور موثر اقوامِ متحدہ کی سلامتی کونسل اور جنرل اسمبلی کی قراردادوں کے مطابق ہو۔
انہوں نے کہا کہ ہم فلسطینی عوام کی اُن کی جائز جدوجہد، اُن کی لازوال مزاحمت اور آزادی، وقار اور امن کی جائز خواہشات میں بھرپور حمایت کرتے ہیں۔