ڈویژنل پبلک اسکول و کالج راولپنڈی میں سالانہ سپورٹس گالا 2025 کی تقریبات شاندار انداز میں شروع

ڈویژنل پبلک اسکول و کالج راولپنڈی میں سالانہ سپورٹس گالا 2025 کی تقریبات شاندار انداز میں شروع ہو گئیں۔ آغازِ تقریب پر طلبہ و طالبات نے دیدہ زیب ٹیبلوز، ملی نغموں اور مختلف ثقافتی پروگرامز پیش کر کے شرکا سے بھرپور داد وصول کی۔ گراؤنڈ میں رنگوں کی برسات، بچوں کی خوشی اور والدین کا جوش و ولولہ قابلِ دید تھا۔

افتتاحی تقریب سے خطاب کرتے ہوئے پرنسپل مس ثمینہ خان نے کہا کہ کھیل بچوں کی شخصیت سازی میں بنیادی کردار ادا کرتے ہیں۔ ان کے بقول، ڈی پی ایس کے طلبہ کے پاس بہترین مواقع موجود ہیں کہ وہ اپنی صلاحیتوں کو نمایاں کر کے نظم و ضبط، محنت، ٹیم ورک اور قیادت جیسی خصوصیات کو عملی طور پر سیکھیں۔ انہوں نے امید ظاہر کی کہ یہاں سے اُبھرتے ہوئے نوجوان مستقبل میں قومی و بین الاقوامی سطح پر کھیلوں کے مقابلوں میں حصہ لے کر ملک کا نام روشن کریں گے۔

ہیڈ ماسٹر افضال عباسی نے اپنے خطاب میں کہا کہ ڈی پی ایس انتظامیہ ہمیشہ کوشش کرتی ہے کہ طلبہ کو کھیلوں کے فروغ کے لیے معیاری سہولیات فراہم کی جائیں۔ انہوں نے بتایا کہ سپورٹس گالا میں اتھلیٹکس، فٹبال، کرکٹ، رسہ کشی، بیڈ منٹن، اور دیگر کھیلوں کے مقابلے پورے ہفتے جاری رہیں گے، جن میں سیکڑوں طلبہ حصہ لے رہے ہیں۔ ان کا کہنا تھا کہ ادارے کا مقصد صحت مند سرگرمیوں کے فروغ کے ساتھ ساتھ طلبہ میں مثبت مقابلے کی فضا قائم کرنا ہے۔

تقریب میں اساتذہ، والدین، سابق طلبہ اور مختلف سماجی شخصیات نے بھی شرکت کی۔ انتظامیہ کے مطابق اختتامی تقریب میں نمایاں کارکردگی دکھانے والے طلبہ میں میڈلز، ٹرافیاں اور تعریفی اسناد تقسیم کی جائیں گی۔ سپورٹس گالا کے آغاز نے پورے ادارے میں خوشگوار ماحول پیدا کر دیا ہے اور طلبہ بھرپور جوش و خروش کے ساتھ مقابلوں میں حصہ لے رہے ہیں۔

اشتہار