خیبرپختونخوا میں سیکیورٹی فورسز کی کارروائیاں کمانڈر سمیت18 دہشت گرد ہلاک
میر علی میں سیکیورٹی فورسز کے کیمپ پر دہشت گردوں کا حملہ ناکام بنادیا گیا، دتہ خیل میں 6 دہشت گرد جبکہ لکی مروت میں 8 دہشت گرد مارے گئے
خیبرپختونخوا میں تین مختلف کارروائیوں کے دوران سیکورٹی فورسز نے ایک کمانڈر سمیت 18 دہشت گرد ہلاک کردئیے،شمالی وزیرستان کے علاقے میر علی میں سیکیورٹی فورسز کے کیمپ پر دہشت گردوں کا حملہ ناکام بنادیا گیا، خودکش حملہ آور سمیت 4 دہشت گرد ہلاک ہوگئے جبکہ دتہ خیل میں انٹیلی جنس بیسڈ آپریشن میں 6 دہشت گرد مارے گئے۔
سیکیورٹی ذرائع کے مطابق میر علی میں دہشت گردوں نے سیکیورٹی فورسز پر خودکش حملے کی کوشش کی، ایک دہشت گرد نے بارود سے بھری گاڑی فورسز کے کیمپ کی دیوار سے ٹکرائی جو دھماکے سے پھٹ گئی، جبکہ 3 مزید دہشت گردوںنے کیمپ میں داخل ہونے کی کوشش کی۔
سیکیورٹی ذرائع کے مطابق بروقت کارروائی میں تینوں دہشت گردوں کو کیمپ کے باہر ہی ہلاک کر دیا گیا، واقعے میں سیکیورٹی فورسز کا کسی قسم کا کوئی نقصان نہیں ہوا۔سیکیورٹی ذرائع کے مطابق سیکیورٹی فورسز نے شمالی وزیرستان کے علاقے ٹنگ کلی (دتہ خیل) میں انٹیلی جنس بیسڈ آپریشن کے دوران کمانڈر سمیت 6 دہشت گردوں کو ہلاک کردیا۔سیکیورٹی ذرائع کے مطابق سیکیورٹی فورسز کو مضافاتی علاقوں میں دہشت گردوں کی نقل و حرکت کی خفیہ اطلاعات موصول ہوئیں، جس پر 8 سے 10 روز تک علاقے کی بھرپور نگرانی کی گئی۔
سیکیورٹی ذرائع کے مطابق 16 اکتوبر کو سیکیورٹی فورسز نے ان دہشت گردوں کو گھیرے میں لے لیا اور فائرنگ کے تبادلے میں 6 دہشت گردوں کو ہلاک اور 3 کو زخمی کردیا۔ سیکیورٹی ذرائع کے مطابق ہلاک ہونے والے دہشت گردوں کا کمانڈر محبوب عرف محمد بھی شامل ہے۔ سیکیورٹی فورسز کی یہ کارروائی علاقے میں امن دشمن عناصر کے خلاف جاری آپریشن کا حصہ ہے، عوام اور سیکیورٹی فورسز ملک سے دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔علاوہ ازیں لکی مروت کے علاقے سلطان خیل میں سیکیورٹی فورسز نے بڑی کامیابی حاصل کرتے ہوئے 8 دہشت گرد ہلاک کردیے۔ سیکیورٹی ذرائع کے مطابق علاقے میں دہشت گردوں کی موجودگی کی اطلاع پر کارروائی عمل میں لائی گئی، فورسز نے سلطان خیل اور طوفان والا کے علاقوں میں فضائی اور زمینی نگرانی شروع کی۔سیکیورٹی ذرائع کا کہنا تھا کہ نگرانی کے دوران دہشت گردوں کی نقل و حرکت کی نشاندہی ہونے پر فوری کارروائی کی گئی اور آپریشن کے دوران 8 دہشت گردووں کو ہلا کردیا، جبکہ آپریشن کے دوران دہشتگردوں کے قبضے سے بھاری مقدار میں اسلحہ اور بارود بھی برآمد ہوا۔
سیکیورٹی ذرائع کا کہنا تھا کہ گزشتہ چار روز میں افغان طالبان کے بھیجے گئے 102 دہشت گرد مارے جا چکے ہیں۔سیکیورٹی ذرائع کے مطابق نیشنل ایکشن پلان کے تحت عوام اور سیکیورٹی فورسز کی جانب سے دہشتگردوں کے خلاف بلا امتیاز اور مسلسل کازروائیاں جاری ہیں۔
