ترقیاتی منصوبوں کی بروقت تکمیل حکومت کی اولین ترجیح ہے: وزیراعظم شہباز شریف
وزیراعظم شہباز شریف نے کہا ہے کہ وفاقی حکومت کے تحت جاری ترقیاتی منصوبوں کی بروقت تکمیل حکومت کی اولین ترجیحات میں شامل ہے۔
وہ آج اسلام آباد میں ایم کیو ایم کے کنوینر اور وفاقی وزیر برائے تعلیم و پیشہ ورانہ تربیت ڈاکٹر خالد مقبول صدیقی کی قیادت میں آنے والے وفد سے گفتگو کر رہے تھے۔
وفد میں گورنر سندھ کامران خان ٹیسوری، قومی اسمبلی کے اراکین ڈاکٹر فاروق ستار، امین الحق اور جاوید حنیف بھی شامل تھے۔
ملاقات کے دوران ملک کی مجموعی سیاسی صورتحال پر تبادلہ خیال کیا گیا۔
ایم کیو ایم وفد نے غزہ میں امن معاہدے کے حوالے سے پاکستان کی کوششوں پر وزیراعظم کو خراجِ تحسین پیش کیا۔
اجلاس میں نائب وزیراعظم اور وزیر خارجہ اسحاق ڈار، وفاقی وزیر برائے منصوبہ بندی احسن اقبال، وفاقی وزیر برائے ہاؤسنگ ریاض حسین پیرزادہ، وفاقی وزیر برائے عوامی امور رانا مبشر اقبال اور وزیراعظم کے مشیر برائے سیاسی امور رانا ثناء اللہ بھی موجود تھے۔
