ویمنز ورلڈ کپ، پاکستان اور انگلینڈ کا میچ بارش کے باعث بے نتیجہ، قومی ٹیم سیمی فائنل دوڑ سے باہر
آئی سی سی ویمنز ورلڈکپ میں پاکستان اور انگلینڈ کا میچ بارش کے باعث ختم کر دیا گیا جس کے بعد قومی ٹیم ایونٹ میں سیمی فائنل کی دوڑ سے باہر ہوگئی ۔کولمبو میں کھیلے گئے میچ میں پاکستان ویمنز ٹیم نے ٹاس جیت کر انگلینڈ کو بیٹنگ کی دعوت دی۔پاکستان کی شاندار بولنگ کے سامنے انگلش ٹیم کی بیٹنگ لائن لڑ کھڑا گئی اور صرف 78 کے مجموعی اسکور پر 7 وکٹیں گرگئیں۔
تاہم بارش کے باعث میچ متاثرہ ہوا اور اسے 31 اوور فی اننگز تک محدود کیا گیا۔ جس میں انگلینڈ نے مقررہ اوورز میں 9وکٹ پر 133 رنز بنائے۔پاکستان کی جانب سے فاطمہ ثنا نے27 رنز کے عوض 4 وکٹیں حاصل کیں جبکہ سعدیہ اقبال نے 2، ڈیانا بیگ او ر رامین شمیم نے ایک ایک وکٹ لی۔بارش سے متاثرہ میچ میں پاکستان کو ڈرک ورتھ لوئس میتھڈ کے تحت 113 رنز کا ہدف ملا۔
ہدف کے تعاقب میں پاکستان ویمنز ٹیم نے 6.4 اوورز میں بغیر نقصان کے 34 رنز بنالیے تھے کہ بارش کی وجہ سےمیچ کو پھر روکا گیا اور بعد ازاں میچ بغیر کسی نتیجے کے ختم کر دیا گیا۔بارش کی وجہ سے پاکستان ویمنز ٹیم کا سابق عالمی چیمپئن کو شکست دینے اور ورلڈکپ 2025 میں پہلی جیت کا خواب ٹوٹ گیا اور ساتھ ہی پاکستان ویمنز ٹیم سیمی فائنل کی دوڑ سے باہر ہوگئی۔
پاکستان اورانگلینڈ کی ٹیموں کو ایک ایک پوائنٹ دے دیا گیا۔واضح رہے کہ پاکستان ویمنز ٹیم کو رواں ایونٹ میں بنگلادیش، بھارت اور آسٹریلیا کے ہاتھوں شکست ہوئی تھی۔پوائنٹس ٹیبل پر پاکستان ویمنز ٹیم 4 میچز میں صرف ایک پوائنٹ کے ساتھ آخری نمبر پر ہے۔ گرین شرٹس نے ایونٹ میں باقی 3 میچز کھیلنے ہیں۔
