ملک کے بیشتر حصوں میں خشک موسم برقرار رہنے کا امکان
محکمہ موسمیات کے مطابق آئندہ 12 گھنٹوں کے دوران ملک کے زیادہ تر علاقوں میں موسم خشک رہنے کی توقع ہے، تاہم شمالی علاقہ جات میں رات اور صبح کے وقت سردی کی شدت میں اضافہ ہو سکتا ہے۔ شہریوں کو مشورہ دیا گیا ہے کہ سرد موسم کے پیش نظر مناسب لباس استعمال کریں، خصوصاً بچے اور بزرگ افراد احتیاطی تدابیر اختیار کریں۔
آج صبح مختلف بڑے شہروں میں درجہ حرارت کچھ یوں ریکارڈ کیا گیا: اسلام آباد میں 15 ڈگری سینٹی گریڈ، لاہور 22، کراچی 26، پشاور 20، کوئٹہ 10، گلگت 13، مری 8 اور مظفرآباد میں 14 ڈگری سینٹی گریڈ ریکارڈ کیا گیا۔ سردی کی ابتدائی لہر کے ساتھ ہی مری، گلگت اور کوئٹہ جیسے علاقوں میں ٹھنڈ میں اضافہ ہو رہا ہے۔
بھارت کے غیر قانونی زیرِ قبضہ جموں و کشمیر میں بھی موسم خشک رہنے کی پیش گوئی کی گئی ہے۔ سری نگر، جموں، پلوامہ، اننت ناگ، شوپیاں اور بارہ مولہ میں مطلع صاف اور خشک رہے گا، جبکہ لیہ میں موسم سرد اور خشک رہنے کی توقع ہے۔ مقبوضہ کشمیر کے مختلف علاقوں میں آج صبح درجہ حرارت کچھ یوں ریکارڈ کیا گیا: سری نگر، اننت ناگ اور شوپیاں میں 8 ڈگری، جموں 17، لیہ صفر، جبکہ پلوامہ اور بارہ مولہ میں 7 ڈگری سینٹی گریڈ ریکارڈ کیا گیا۔
محکمہ موسمیات کا کہنا ہے کہ خشک موسم کے باعث فلو، زکام اور سانس کی الرجی جیسی موسمی بیماریاں بڑھ سکتی ہیں، اس لیے عوام احتیاطی تدابیر اختیار کریں اور کھلی فضا میں غیر ضروری گھومنے سے گریز کریں۔
