پاکستان اورمصرکاغزہ میں امن کی کوششیں جاری رکھنے پراتفاق

نائب وزیراعظم محمد اسحاق ڈار نے مصری وزیر خارجہ ڈاکٹر بدر عبدالعاطی سے ٹیلی فون پر بات چیت کی ہے۔دونوں وزراء نے نیویارک میں عرب اور اسلامی ممالک کے درمیان ہونے والی مشاورت سمیت جاری سفارتی کوششوں پر تبادلہ خیال کیا، جس کا مقصد غزہ میں فوری طور پر پائیدار جنگ بندی، بلا روک ٹوک انسانی امداد کو یقینی بنانا اور پائیدار امن کے حصول کے لیے اجتماعی اقدامات کو آگے بڑھانا ہے۔

نائب وزیر اعظم نے ان کوششوں کے لیے پاکستان کی حمایت کا اعادہ کیا۔ انہوں نے کہا پاکستان حالیہ پیشرفت کا خیرمقدم کرتا ہے۔اسحاق ڈار کا کہنا تھا کہ مجوزہ امن منصوبے پر حماس کے ردعمل سے خونریزی کے خاتمے کی امید پیدا ہوئی ہے۔

انہوں نے مصری وزیر خارجہ کو مستقبل قریب میں پاکستان کے دورے کی دعوت بھی دی جسے انہوں نے قبول کر لیا۔فریقین نے غزہ میں منصفانہ اور دیرپا امن کے حصول میں مدد کے لیے اپنی کوششیں جاری رکھنے پر اتفاق کیا۔

اشتہار