قومی ٹیسٹ سکواڈ کا اعلان، شان مسعود کپتان برقرار، بابر، رضوان، شاہین شامل
قومی سلیکشن کمیٹی نے جنوبی افریقہ کے خلاف دو ٹیسٹ میچز پر مشتمل ہوم سیریز کے لیے 18 رکنی قومی سکواڈ کا اعلان کر دیا ہے۔ شان مسعود بدستور ٹیم کی قیادت کریں گے۔
اعلان کردہ سکواڈ میں کچھ نئے چہرے بھی شامل کیے گئے ہیں، جن میں آصف آفریدی، فیصل اکرم اور وکٹ کیپر بلے باز روحیل نذیر شامل ہیں۔ سلیکشن کمیٹی کے مطابق ایشیا کپ میں شرکت کرنے والے کھلاڑی 4 اکتوبر کو کیمپ کو جوائن کریں گے، جبکہ پہلا ٹیسٹ شروع ہونے سے قبل حتمی سکواڈ کو مزید مختصر کر دیا جائے گا۔
پاکستان اور جنوبی افریقہ کے درمیان سیریز کا پہلا ٹیسٹ 12 سے 16 اکتوبر تک لاہور کے قذافی اسٹیڈیم میں کھیلا جائے گا، جبکہ دوسرا ٹیسٹ 20 سے 24 اکتوبر تک راولپنڈی کرکٹ اسٹیڈیم میں ہوگا۔ دونوں میچز کے لیے تیاریوں کے سلسلے میں قومی کیمپ 30 ستمبر سے 8 اکتوبر تک لاہور میں جاری رہے گا۔
اعلان کردہ سکواڈ میں بابر اعظم، محمد رضوان، اور شاہین شاہ آفریدی جیسے تجربہ کار کھلاڑی شامل ہیں۔ ان کے علاوہ عبداللہ شفیق، امام الحق، سلمان علی آغا، سعود شکیل، عامر جمال، کامران غلام، حسن علی اور خرم شہزاد بھی ٹیم کا حصہ ہیں۔
ٹیم میں تین اسپن باؤلرز کو بھی شامل کیا گیا ہے جن میں نعمان علی، ساجد خان اور ابرار احمد شامل ہیں۔ یہ تینوں اسپنرز حالیہ کارکردگی کی بنیاد پر سلیکٹرز کا اعتماد حاصل کرنے میں کامیاب رہے ہیں۔
کرکٹ تجزیہ کاروں کا ماننا ہے کہ یہ سیریز نوجوان اور تجربہ کار کھلاڑیوں کے امتزاج سے متوازن ٹیم کے لیے ایک اہم موقع ثابت ہو سکتی ہے، خاص طور پر ان کھلاڑیوں کے لیے جو اپنی جگہ مستقل طور پر پکی کرنا چاہتے ہیں۔
