پاکستان اور ہنگری کا باہمی تعلقات کو مزید مضبوط بنانے کے عزم کا اعادہ
پاکستان اور ہنگری نے سرمایہ کاری کے تحفظ، سول ایوی ایشن میں تعاون، اور دونوں ممالک کے درمیان براہِ راست پروازوں کے آغاز سے متعلق معاہدوں کو جلد حتمی شکل دینے کے عزم کا اعادہ کیا ہے۔
یہ اتفاقِ رائے نیویارک میں اقوام متحدہ کی جنرل اسمبلی کے 80ویں اجلاس کے موقع پر نائب وزیراعظم اسحاق ڈار اور ہنگری کے وزیر خارجہ پیٹر سزیجارتو کے درمیان ملاقات میں ہوا۔
ملاقات میں سفارتی اور سرکاری پاسپورٹ رکھنے والوں کے لیے ویزا کی چھوٹ سے متعلق معاہدے کو بھی جلد مکمل کرنے پر زور دیا گیا۔
دونوں رہنماؤں نے پاکستان اور ہنگری کے مابین سفارتی تعلقات کے قیام کی 60ویں سالگرہ کے موقع پر دوطرفہ روابط کو مزید مستحکم کرنے اور تعاون کے نئے امکانات تلاش کرنے کے عزم کا اظہار کیا۔
نائب وزیراعظم اسحاق ڈار نے پاکستان میں تجارتی و سرمایہ کاری مواقع بڑھانے کے لیے حکومتی اقدامات سے آگاہ کیا اور ہنگری کی سرمایہ کاری کو سہولت فراہم کرنے کے عزم کا اعادہ کیا۔
ہنگری کے وزیر خارجہ نے پاکستان میں ہنگرین سرمایہ کاری کے فروغ کے لیے وزیر اعظم اور نائب وزیر اعظم کی ذاتی دلچسپی اور تعاون پر شکریہ ادا کیا۔
اس موقع پر اسحاق ڈار نے ہنگری کی جانب سے پاکستانی طلبا کو 400 اسکالرشپس فراہم کرنے پر بھی اظہارِ تشکر کیا۔
وزیر خارجہ پیٹر سزیجارتو نے تعلیمی میدان میں تعاون جاری رکھنے اور پاکستانی طلبا کے لیے مزید مواقع فراہم کرنے کی یقین دہانی کرائی۔
ملاقات کے دوران علاقائی اور عالمی امن و سلامتی سے متعلق امور پر بھی تبادلہ خیال کیا گیا۔
