صدر اور وزیرِ اعظم کا عالمی یومِ امن پر امن و انصاف کے عزم کا اعادہ
صدرِ مملکت آصف علی زرداری اور وزیرِ اعظم محمد شہباز شریف نے عالمی یومِ امن کے موقع پر اپنے علیحدہ علیحدہ پیغامات میں پاکستان کی امن، انصاف اور انسانی وقار کے اعلیٰ اصولوں سے غیر متزلزل وابستگی کا اعادہ کیا ہے۔
صدرِ مملکت نے اپنے پیغام میں کہا کہ پاکستان ایک پُرامن، منصفانہ اور پائیدار دنیا کے قیام کے لیے مثبت کردار ادا کرنے کو ہر دم تیار ہے۔ انہوں نے کہا کہ علاقائی اور عالمی امن و استحکام میں پاکستان کے تعمیری کردار کو دنیا بھر میں سراہا جا رہا ہے۔
وزیرِ اعظم شہباز شریف نے اپنے پیغام میں زور دیا کہ دنیا کو بھارت کے غیرقانونی زیرِ قبضہ جموں و کشمیر اور مقبوضہ فلسطینی علاقوں میں جاری سنگین انسانی المیوں کو نظرانداز نہیں کرنا چاہیے۔ انہوں نے کہا کہ جب تک ان علاقوں کے عوام کو اقوامِ متحدہ کی سلامتی کونسل کی قراردادوں کے مطابق حقِ خودارادیت نہیں دیا جاتا، تب تک پائیدار امن ایک خواب ہی رہے گا۔
وزیرِ اعظم نے عالمی برادری پر زور دیا کہ وہ امن، انصاف اور انسانیت کے لیے مشترکہ جدوجہد کرے، اور یقین دہانی کرائی کہ پاکستان اس مقصد کے لیے اپنا کردار بھرپور طریقے سے ادا کرتا رہے گا۔
