پاکستان اور بنگلہ دیش بین المذاہب ہم آہنگی کے فروغ پر متفق
پاکستان اور بنگلہ دیش نے دونوں ممالک کے درمیان بین المذاہب ہم آہنگی کے فروغ کے لیے مشترکہ ورکنگ گروپ تشکیل دینے پر اتفاق کیا ہے۔یہ بات مذہبی امور اور بین المذاہب ہم آہنگی کے وزیر سردار محمد یوسف اور مشیر برائے مذہبی امور اے ایف ایم خالد حسین کی قیادت میں بنگلہ دیش کے وفد کے درمیان آج اسلام آباد میں ملاقات میں سامنے آئی۔ اس موقع پر سردار محمد یوسف نے بنگلہ دیش کے ساتھ مدارس کے علماء اور طلباء کے دوروں کے تبادلے کی تجویز پیش کی۔انہوں نے کہا کہ دونوں ممالک کے درمیان تعلقات صدیوں کی مشترکہ روایات، اسلامی ورثے، سماجی اقدار اور ادبی اظہار پر مبنی ہیں۔وفاقی وزیر نے کہا کہ پاکستان اور بنگلہ دیش کے درمیان دوطرفہ تعلقات میں بہتری خطے کے لیے بھی مفید ثابت ہوگی۔اپنے ریمارکس میں خالد حسین نے کہا کہ دونوں ممالک کی وزارت مذہبی امور کے درمیان باہمی تعاون کو فروغ دینے کے لیے اقدامات کیے جائیں گے۔بنگلہ دیشی وفد نے پاکستان میں سیلاب سے ہونے والے جانی و مالی نقصان پر گہرے دکھ کا اظہار کیا۔
