ایس آئی ایف سی کی معاونت، ریکوڈک منصوبہ کیلئے عالمی اداروں کی 6بلین ڈالر کی فنڈنگ منظور
پاکستان کے بڑے معدنیاتی منصوبے ریکوڈک میں اقتصادی ترقی کی جانب ایک اہم پیش رفت سامنے آئی ہے۔اسپیشل انویسٹمنٹ فیسلیٹیشن کونسل ( ایس آئی ایف سی ) کی معاونت سے منصوبے کے لیے درکار فنڈز کی منظوری دے دی گئی ہے۔امریکہ، جاپان اور دیگر عالمی مالیاتی اداروں نے ریکوڈک منصوبے کے لیے 6 بلین ڈالر کی مجموعی فنڈنگ کا اعلان کیا ہے، جن میں سے 1.05 بلین ڈالر کی منظوری ایشیائی ترقیاتی بینک (ADB) اور ورلڈ بینک کی جانب سے پہلے ہی دی جا چکی ہے۔اے ڈی بی کے مطابق ریکوڈک منصوبہ عالمی سطح پر تانبے کی کمی کو پورا کرنے میں معاون ثابت ہوگا، جبکہ پاکستان میں روزگار کے مواقع پیدا کرنے کے ساتھ ساتھ علاقائی اور سماجی ترقی کو بھی فروغ دے گا۔ماہرین کے مطابق ریکوڈک کے معدنی ذخائر پاکستان کی معیشت کے لیے سب سے بڑی غیر ملکی سرمایہ کاری کا سنگ میل ہیں جو مستقبل میں ملک کی اقتصادی ترقی کے لیے کلیدی کردار ادا کریں گے۔
