وزیراعلیٰ کی ہدایت پر صنعتی کارکنوں کو فلیٹ کی الاٹمنٹ کا سلسلہ شروع
وزیراعلیٰ پنجاب مریم نواز شریف کی مزدور دوست پالیسی کے ثمرات سامنے آنے لگے۔وزیراعلیٰ کی ہدایت پر صنعتی کارکنوں کو فلیٹ کی الاٹمنٹ کا سلسلہ شروع ہو گیا، ضلع لاہور اور قصور کے صنعتی ورکرز سے فلیٹ کی الاٹمنٹ کے لئے درخواستیں طلب کر لی گئیں۔وزیراعلیٰ مریم نوازشریف کی ہدایت پر انتقال کرجانے والے صنعتی ورکرز کی بیوگان کے لئے بھی 3فیصد کوٹہ مختص کیا گیا ہے۔ اسی طرح معذور ورکرز کا بھی فلیٹ الاٹمنٹ میں 2فیصد کوٹہ ہوگا۔ پنجاب ورکرز ویلفیئر فنڈ نے ورکرز ویلفیئر کمپلیکس سندر انڈسٹریل سٹیٹ قصور فیز ون میں الاٹمنٹ کی کارروائی کا آغاز کردیا ۔
وزیراعلیٰ مریم نوازشریف کی ہدایت پر ورکرز ویلفیئر کمپلیکس میں صنعتی کارکنوں کو 720فلیٹ دئیے جائیں گے۔ضلع لاہور اور قصور کے صنعتی کارکنوں کے لئے گھر بیٹھے ویب سائٹ سے درخواست فارم حاصل کرنے کی سہولت فراہم کی گئی ہے۔ فلیٹ الاٹمنٹ کے لئے ڈائریکٹر لیبر ویلفیئر نارتھ و ساؤتھ اور ڈپٹی ڈائریکٹر لیبر ویلفیئر قصور کے دفتر سے بھی فارم حاصل کئے جاسکتے ہیں۔ درخواستیں جمع کرانے کیلئے 8ستمبر آخری تاریخ مقرر کی گئی ہے۔ضلع قصور کے صنعتی ورکرز کے لئے دو تہائی اور ضلع لاہور کے ورکرز کے لئے ایک تہائی ہاؤسنگ یونٹ کوٹہ مقررکیا گیا ہے۔www.pwwf.punjab.gov.pk،www.labour.punjab.gov.pk پر گھر بیٹھے اپلائی کرسکتے ہیں۔صنعتی ورکرز 049-2724261–0331-4436944،صنعتی کارکن پنجاب ویلفیئر فنڈ رابطہ نمبر 042-99260240پر بھی رابطہ کرسکتے ہیں۔
