چین کے ساتھ دوستی پاکستان کی خارجہ پالیسی کا بنیادی ستون ہے، صدر آصف علی زرداری
صدر مملکت آصف علی زرداری نے چینی وزیر خارجہ وانگ ژی سے ملاقات کے دوران کہا ہے کہ چین نے ہمیشہ پاکستان کی خودمختاری اور ترقی میں مدد کی۔
سرکاری خبر رساں ادارے کی رپورٹ کے مطابق صدرِ پاکستان آصف علی زرداری نے ایوانِ صدر میں چین کے وزیرِ خارجہ اور کمیونسٹ پارٹی آف چائنا کی مرکزی کمیٹی کے پولیٹیکل بیورو کے رکن وانگ ژی سے ملاقات کی، چین کے نائب وزیرِ خارجہ سن وی ڈونگ اور سفیر جیانگ زائی ڈونگ بھی موجود تھے۔
ملاقات میں دوطرفہ تعاون اور علاقائی سلامتی سے متعلق امور پر بھی تبادلہ خیال ہوا، اس موقع پر نائب وزیراعظم و وزیرِ خارجہ سینیٹر اسحٰق ڈار، وزیر برائے منصوبہ بندی و ترقی احسن اقبال، وزیر داخلہ محسن رضا نقوی، چیئرمین پیپلز پارٹی بلاول بھٹو زرداری، رکنِ قومی اسمبلی حنا ربانی کھر، صدر کے ترجمان مرتضیٰ سولنگی اور سیکریٹری خارجہ بھی موجود تھے۔
اس موقع پر آصف علی زرداری نے کہا کہ پاکستان اور چین آہنی بھائی، آزمودہ دوست اور ہر موسم کے اسٹریٹجک شراکت دار ہیں جب کہ چین کے ساتھ دوستی پاکستان کی خارجہ پالیسی کا بنیادی ستون ہے، جسے ملک میں عوام، سیاست اور ادارہ جاتی سطح پر مکمل حمایت حاصل ہے۔
صدرِ مملکت نے پاکستان کی خودمختاری، علاقائی سالمیت، قومی ترقی اور مسئلہ جموں و کشمیر پر چین کی اصولی اور منصفانہ حمایت پر شکریہ ادا کیا۔انہوں نے بیجنگ اور گانسو صوبے میں حالیہ سیلاب کے باعث قیمتی جانوں کے ضیاع پر چینی قیادت اور عوام سے اظہارِ تعزیت بھی کیا۔
آصف علی زرداری نے رواں سال اپنے دورہ چین کا ذکر کرتے ہوئے کہا کہ اس موقع پر صدر شی جن پنگ اور چینی قیادت سے ملاقاتیں کامیاب رہیں، جنہوں نے پاک-چین آہنی بھائی چارے پر ان کے اعتماد کو مزید مستحکم کیا۔
انہوں نے کہا کہ اپنے گزشتہ دورِ صدارت کے دوران انہوں نے 14 بار چین کا دورہ کیا تاکہ اس کی ترقی و پیشرفت کا قریب سے مطالعہ کیا جا سکے، جو بعد میں پاک-چین اقتصادی راہداری (سی پیک) کی بنیاد ثابت ہوا۔
ان کا کہنا تھا کہ 2026 میں پاکستان اور چین کے درمیان سفارتی تعلقات کے قیام کی 75ویں سالگرہ منائی جائے گی، جسے شایانِ شان طریقے سے منانے کی تیاری کی جا رہی ہے۔
انہوں نے کہا کہ اس موقع کو دونوں ملک نئی نسل کو پاک-چین دوستی کی بہترین روایات منتقل کرنے کے لیے استعمال کر سکتے ہیں۔
صدر پاکستان نے سی پیک کو صدر شی جن پنگ کے فلیگ شپ بیلٹ اینڈ روڈ انیشی ایٹو کا حصہ قرار دیتے ہوئے کہا کہ یہ دونوں ممالک کے لیے زبردست اسٹریٹجک اہمیت کا حامل ہے۔
انہوں نے مزید کہا کہ سی پیک خطے میں بہتر روابط، معاشی انضمام اور پُرامن ماحول کے ہمارے مشترکہ وژن کو حقیقت بنانے کا اہم ذریعہ ہے۔
دوسری جانب، چینی وزیر خارجہ وانگ ژی نے کہا کہ پاک-چین دوستی نسل در نسل قائم رہی ہے جو نیک نیتی، اعتماد اور ہر موسم کی اسٹریٹجک شراکت داری پر مبنی ہے۔
انہوں نے کہا کہ صدر شی جن پنگ کا وژن ہے کہ پاکستان اور چین کا مستقبل مشترکہ ہے اور دونوں عوام کو مزید قریب لانے کے لیے کام کیا جانا چاہیے۔
