وزیراعظم شہبازشریف کا مون سون بارشوں، سیلابی صورتحال کے حوالے سے سیاسی رہنماؤں سے رابطہ
وزیراعظم محمد شہبازشریف نے مون سون کی شدید بارشوں اور سیلاب کی صورتحال کے حوالے سے سیاسی رہنماؤں سے رابطہ کیا ہے۔وزیراعظم نے چیئرمین پاکستان پیپلز پارٹی بلاول بھٹو زرداری سے رابطہ کیا اور جنوبی سندھ بالخصوص کراچی میں طوفانی بارشوں اور شہری سیلاب سے قیمتی جانوں کے ضیاع پر دکھ اور افسوس کا اظہار کیا۔شہباز شریف نے ہنگامی صورتحال سے نمٹنے کے لیے وفاقی حکومت کی جانب سے سندھ حکومت کو مکمل تعاون کی پیشکش کی۔
وزیراعظم نے چیئرمین این ڈی ایم اے کو ہدایت کی کہ وہ سندھ حکومت کے ساتھ قریبی رابطے میں رہیں، پراونشل ڈیزاسٹر مینجمنٹ اتھارٹی (پی ڈی ایم اے) کو ہر ممکن مدد فراہم کریں اور عوام کو ممکنہ خطرات سے متعلق پیشگی الرٹ کو یقینی بنائیں۔
شہباز شریف نے امیر جماعت اسلامی حافظ نعیم الرحمن اور وفاقی وزیر تعلیم و پیشہ وارانہ تربیت ڈاکٹر خالد مقبول صدیقی سے بھی ٹیلی فونک گفتگو کی۔وزیراعظم اور امیر جماعت اسلامی نے خیبرپختونخوا میں حالیہ بارشوں سے ہونے والے نقصانات اور جاری امدادی کارروائیوں پر تبادلہ خیال کیا۔
انہوں نے بارشوں اور سیلاب کے دوران ریسکیو اور ریلیف آپریشنز میں الخدمت فاؤنڈیشن کے فعال کردار کو سراہا۔وزیراعظم اور ڈاکٹر خالد مقبول صدیقی نے سندھ میں حالیہ بارشوں اور سیلاب کی صورتحال اور متوقع بارشوں سے پیدا ہونے والے ممکنہ خطرات پر تبادلہ خیال کیا۔شہباز شریف نے کسی بھی ہنگامی صورتحال سے نمٹنے کے لیے وفاقی حکومت بشمول این ڈی ایم اے اور دیگر وفاقی اداروں کی جانب سے مکمل تعاون کی یقین دہانی کرائی۔
