وزیر اعلیٰ پنجاب کا ممکنہ طوفانی بارشوں کے پیش نظر متعلقہ اداروں کو الرٹ رہنے کا حکم
وزیر اعلیٰ مریم نواز شریف نے پنجاب میں ممکنہ طوفانی بارشوں کے پیش نظر متعلقہ اداروں کو الرٹ رہنے کا حکم دے دیا۔وزیراعلیٰ مریم نواز شریف نے پی ڈی ایم اے پنجاب انتظامیہ، پولیس، ریسکیو کو ضروری پیشگی اقدامات کی ہدایت کی، مریم نواز شریف نے ڈپٹی کمشنرز اور دیگر متعلقہ افسران کو فیلڈ میں موجود رہنے کے احکامات جاری کئے۔مریم نواز شریف نے کہا کہ ڈپٹی کمشنرز پی ڈی ایم اے پنجاب کی جاری کردہ ہدایات پر عملدرآمد یقینی بنائیں، وزیراعلیٰ پنجاب نے حکام کو بالائی پنجاب میں کلاؤڈ برسٹ کے خدشے کے پیش نظر ضروری اقدامات کی ہدایت کی ہے۔
انہوں نے کوہ سلیمان رود کوہیوں میں ممکنہ سیلابی ریلوں سے بچاؤ کے لئے پیشگی انتظامات کا حکم جاری کیا، انہوں نے مری، راولپنڈی، جہلم، چکوال اور کوہ سلیمان کے اضلاع میں خصوصی ا قدامات کا حکم دیا۔وزیراعلیٰ پنجاب نے حفاظتی اقدامات کے پیش نظر مری اور متصل علاقوں کی طرف سیاحتی سفر پر پابندی پر اتفاق کیا اور کلاؤڈ برسٹ، لینڈ سلائیڈنگ اور طوفانی بارشوں کے پیش نظر سیاحوں کی نقل وحمل محدود کرنے کی ہدایت کی۔
مریم نوازشریف کی ہدایت پر پی ڈی ایم اے پنجاب فوری متحرک، درکار وسائل مہیا کرنے کے لئے سرگرم ہوگیا، پی ڈی ایم اے نے پنجاب کی ڈپٹی کمشنرز کو طوفانی بارشوں کے پیش نظر دریاؤں کے بہاؤ میں غیر معمولی اضافے کے خدشے کے پیش نظر پیشگی اقدامات کی ہدایت کی۔وزیراعلی پنجاب کی ہدایت پر آبی گزر گاہوں کے ارد گرد آبادیوں کے لئے کشتیاں، لائف جیکٹ اور دیگر سامان مہیا کر دیا گیا۔
مریم نواز شریف کا کہنا ہے کہ دریاؤں کے پاٹ میں موجود شہریوں کے فوری انخلا کو یقینی بنایا جائے، انہوں نے دریاؤں، نہروں و ندی نالوں میں طغیانی کے پیش نظر نہانے پر پابندی یقینی بنانے کی ہدایت کی۔وزیراعلیٰ نے دریاؤں اور ندی نالوں کے کناروں پر پولیس پٹرولنگ کی ہدایت کی اور والدین سے اپیل کی کہ وہ اپنے بچوں کو دریاؤں اور ندی نالوں کے قریب جانے سے روکیں۔
