نیوزی لینڈ کے وزیراعظم کی پاکستان کے یوم آزادی کی تقریب میں شرکت
نیوزی لینڈ کے وزیر اعظم کرسٹوفر لکسن نے ہفتہ کو آکلینڈ میں پاکستان کے یوم آزادی کی شاندار تقریب میں شرکت کی۔تقریب میں وزیر برائے نسلی برادری مارک مچل، قائد حزب اختلاف اور سابق وزیراعظم کرس ہپکنز، نیوزی لینڈ میں پاکستان کے ہائی کمشنر فیصل عزیز احمد اور کئی اراکین پارلیمنٹ نے شرکت کی۔کیوی پاکستانیوں کے بڑے اجتماع سے خطاب کرتے ہوئے وزیراعظم کرسٹوفر لکسن نے پاکستان کو اس کے یوم آزادی پر مبارکباد دی۔
انہوں نے پاکستان اور نیوزی لینڈ کے درمیان دیرینہ، گرمجوشی اور دوستانہ تعلقات پر روشنی ڈالی اور نیوزی لینڈ کی ترقی میں پاکستانی کمیونٹی کے تعاون کو سراہا۔قبل ازیں نیوزی لینڈ میں پاکستان کے ہائی کمشنر ڈاکٹر فیصل عزیز احمد نے پرچم کشائی کی علامتی تقریب کی اور وزیراعظم اور دیگر معززین کو پاکستان کی بنی ہوئی شالیں تحفے میں دیں۔
پرچم کشائی کے علاوہ، تقریب میں شاعری، ثقافتی پرفارمنس، ویڈیو اسکریننگ، اور قومی اور حب الوطنی کے گیت پیش کیے گئے۔ اس موقع پر ایک نئی انٹرایکٹو PANZ ویب سائٹ کی نقاب کشائی کی گئی۔پاکستان کے یوم آزادی کے موقع پر منعقدہ تقریب میں نیوزی لینڈ کے وزیر اعظم کی شرکت کو پاکستان کے لیے جذبہ خیر سگالی کے خصوصی طور پر سراہا گیا۔
اس تقریب کی میزبانی پاکستان ایسوسی ایشن آف نیوزی لینڈ نے پاکستانی ہائی کمیشن، نیوزی لینڈ کی وزارت برائے نسلی برادری اور آکلینڈ میں مقیم پاکستانیوں کے متعدد کاروباروں کے تعاون سے کی تھی۔یہ پاکستان کے یوم آزادی کی تقریبات کے موقع پر نیوزی لینڈ کے مختلف شہروں میں منعقد ہونے والے ہائی پروفائل پروگراموں کے سلسلے کا حصہ تھا۔
