این بی پی نے پاکستان کا 78 واں یوم آزادی خصوصی صلاحیت کے حامل بچوں کے ساتھ منایا
نیشنل بینک آف پاکستان (این بی پی) نے پاکستان کا 78 واں یوم آزادی جوش و جذبے اور فخر کے ساتھ منایا۔ این بی پی کی قیادت، ملازمین اور اُن کے اہل خانہ نے حب الوطنی کے جذبے سے سرشار ہوکر یوم آزادی کی مناسبت سے تقریبات میں شرکت کیں۔ این بی پی ہیڈ کوارٹر میں منعقدہ ایونٹس میں قومی پرچم لہرانے، قومی ترانہ گانے اور کیک کاٹنے کی تقریبات شامل تھیں۔رواں سال قومی ترانے کو ایک خاص اور دل کو چھو لینے والا رنگ اُس وقت ملا جب ڈیف ریچ اسکول کے بچوں نے اشاروں کی زبان میں اس میں حصہ لیا۔ ان کی شمولیت یاددہانی تھی کہ حب الوطنی الفاظ سے بڑھ کر ہے۔ یہ اتحاد، شمولیت اور ہر صورت میں وطن سے محبت کا نام ہے۔
اس موقع پر این بی پی کے صدر رحمت علی حسنی نے کہا، ”یومِ آزادی عوام کی استقامت، جرات اور عزم کو خراجِ تحسین پیش کرنے کا دن ہے۔ ہمیں اپنے وطن کی کامیابیوں پر فخر ہے اور ہم اس کی معاشی اور سماجی ترقی میں اپنا کردار ادا کرنے کے لیے پرعزم ہیں۔ یہ دن اُن لازوال قربانیوں کو یاد کرنے کا موقع ہے جو پاکستان کی آزادی کے لیے دی گئیں، اور اُن اقدار و اصولوں کے تحفظ کے عہد کی تجدید کا وقت بھی ہے جن پر یہ ملک قائم ہوا۔“انہوں نے مزید کہا، ”مالیاتی خدمات تک رسائی کو آسان بنا کر، کاروباری مواقع فراہم کرکے اور پائیدار ترقی میں تعاون کے ذریعے بینک کا مقصد آنے والی نسلوں کے لیے ایک خوشحال اور مستحکم پاکستان کی تعمیر میں بامعنی کردار ادا کرنا ہے۔“
پاکستان کی آزادی کے 78 سال مکمل ہونے پر نیشنل بینک آف پاکستان نے ایک بار پھر ملک کی ترقی، خوشحالی اور اتحاد میں اپنا کردار ادا کرنے کے عزم کو دوہرایا۔ یہ جشن اس بات کی یاد دہانی بھی تھا کہ ہمارے بزرگوں کی دی گئی قربانیوں کے بعد اب ہم سب پر ذمہ داری عائد ہوتی ہیں کہ آنے والی نسلوں کے لیے ایک بہتر مستقبل کی تعمیر کریں۔
