صدر اور وزیراعظم کا دہشت گردی کے خلاف جنگ جاری رکھنے کا عزم
صدر آصف علی زرداری اور وزیر اعظم محمد شہباز شریف نے پاکستان افغانستان سرحد کے ساتھ ضلع ژوب کے علاقے سمبازہ میں خوارج کے خلاف ایک اور کامیاب آپریشن پر سیکیورٹی فورسز کے افسران اور جوانوں کو شاباش دی ہے۔اپنے الگ الگ بیانات میں، انہوں نے گزشتہ چار دنوں کے دوران پچاس ہندوستانی حمایت یافتہ دہشت گردوں کو ہلاک کرنے پر سیکورٹی فورسز کی ستائش کی، جو ان کی پیشہ ورانہ مہارت، بہادری اور عزم کا منہ بولتا ثبوت ہے۔صدر نے کہا کہ قوم دہشت گردی کے خلاف اپنی بہادر مسلح افواج کے ساتھ کندھے سے کندھا ملا کر کھڑی ہے۔ انہوں نے کہا کہ پاکستان کے امن، استحکام اور ترقی کے دشمن کبھی کامیاب نہیں ہوں گے۔
انہوں نے اس عزم کا اظہار کیا کہ دہشت گردی کے مکمل خاتمے تک جنگ پوری قوت کے ساتھ جاری رہے گی۔اپنے بیان میں وزیراعظم شہباز شریف نے چند روز قبل اسی علاقے میں اڑتالیس دہشت گردوں کو بے اثر کرنے والے کامیاب آپریشن کے بعد مزید تین بھارتی سپانسر دہشت گردوں کو ہلاک کرنے پر سیکیورٹی فورسز کے افسران اور جوانوں کی پیشہ وارانہ مہارت کی تعریف کی۔
وزیراعظم نے اس عزم کا اظہار کیا کہ پاکستان ملک سے دہشت گردی کے مکمل خاتمے تک اس کے خلاف جنگ جاری رکھے گا۔انہوں نے کہا کہ پاکستان کی مسلح افواج وطن کو دہشت گردوں سے پاک کرنے کے مشن میں دن رات مصروف عمل ہیں اور اس مقصد کے لیے ان سمیت پوری قوم انہیں خراج تحسین پیش کرتی ہے۔ وزیراعظم نے کہا کہ پوری قوم ملک سے دہشت گردی کے مکمل خاتمے کے لیے اپنی مسلح افواج کے شانہ بشانہ کھڑی ہے۔
