کیپٹن محمد سرور شہید کو صدر، وزیراعظم کا خراج عقیدت
صدر مملکت اور وزیراعظم پاکستان نے کیپٹن محمد سرور شہید (نشان حیدر) کے 77 ویں یوم شہادت پر انہیں خراج عقیدت پیش کیا ہے۔اپنے پیغام میں صدر مملکت آصف علی زرداری نے کہا کہ آج کے دن کشمیر کی پہلی جنگ میں کیپٹن محمد سرور شہید نے مادر وطن کیلئے جان کا نذرانہ پیش کیا، قوم کو کیپٹن محمد سرور شہید کی جرات، استقامت اور عظیم قربانی پر فخر ہے۔انہوں نے کہا کہ آج کا محفوظ پاکستان ہمارے ہیروز کی عظیم قربانیوں کا نتیجہ ہے، پوری قوم کیپٹن محمد سرور شہید کی بہادری اور قربانی کو سلام پیش کرتی ہے۔
آصف زرداری کا مزید کہنا تھا کہ کیپٹن محمد سرور نے اپنی جان دے کر قومی دفاع کا ناقابل فراموش باب رقم کیا، شہدا کی قربانیاں ملکی دفاع اور قومی استحکام کی بنیاد ہیں، قوم کیپٹن محمد سرور شہید کی قربانی کو ہمیشہ یاد رکھے گی۔دوسری جانب وزیراعظم شہباز شریف نے کیپٹن محمد سرور شہید کے 77 ویں یوم شہادت پر اپنے پیغام میں کہا کہ پوری قوم کیپٹن محمد سرور شہید کی جرأت و بہادری پر خراج عقیدت پیش کرتی ہے۔
وزیراعظم شہباز شریف کا کہنا تھا کہ قوم کے بہادر سپوت نے دشمن کے ناپاک عزائم کو خاک میں ملاتے ہوئے جام شہادت نوش کیا، افواجِ پاکستان کے جوانوں نے ہمیشہ مادر وطن کے دفاع کو اپنی جانوں پر فوقیت دی، پاکستانی قوم اپنے شہدا کی قربانیوں کو کبھی فراموش نہیں کر سکتی۔وفاقی وزیر داخلہ محسن نقوی نے اپنے پیغام میں کہا کہ 27 جولائی 1948 پاکستان کی عسکری تاریخ میں وہ دن ہے جب دفاع وطن کی راہ میں پہلا نشان حیدر امر ہوا، کیپٹن محمد سرور شہید نے اڑی سیکٹر میں غیر معمولی جرات کا مظاہرہ کیا۔
ان کا کہنا تھا کہ کیپٹن محمد سرور شہید نے پیش قدمی جاری رکھی اور دشمن کے مضبوط مورچوں کو بہادری سے فتح کیا، شدید زخمی ہونے کے باوجود کیپٹن سرور شہید نے آخری دم تک دشمن کا بھرپور مقابلہ کیا اور دفاع وطن کا حق ادا کیا، کیپٹن سرور شہید نے میدان جنگ میں بہادری،شجاعت اور جرات کی روشن مثال قائم کی۔
انہوں نے کہا کہ ملک و ملت سے غیر متزلزل وفاداری اور جذبہ شہادت سے سرشار کیپٹن سرور شہید نے عسکری اقدار کو نئی بلندی عطا کی، افواج پاکستان کے جری سپوت آج بھی کیپٹن محمد سرور شہید کے نقش قدم پر عمل پیرا ہیں۔محسن نقوی کا مزید کہنا تھا کہ مادر وطن کے دفاع میں شہداء کی قربانیاں ایک زندہ عہد ہیں، کیپٹن محمد سرور کے یوم شہادت پر پوری قوم ان کی لازوال قربانی کو سلام پیش کرتی ہے اور دفاع وطن کے عہد کی تجدید کرتی ہے۔
